Los sindicatos esixen que se reconozan los derechos de los trabayadores n’Andorra

Andorra ye ún de los países onde'l 1 de mayu nun ye festivu. La falta d'una xornada de celebración del Día del trabayu ye namás ún de los puntos qu'amuesen la falta de llexislación y de reconocimientu de los derechos de los trabayadores nun llugar marcáu poles irregularidaes llaborales, xenerando una situación d'arbitrariedá que tamién afecta a bien d'asturianos emigraos a esti país pirenaicu, onde los más d'ellos trabayen na hostelería.

Con motivu del pasáu primeru de mayu, los dirixentes de los principales sindicatos andorranos, qu'entamaron a organizase nos años 90 y que se reconocieron llegalmente nel 2001 quieren llevar alantre una campaña internacional empobinada a forzar al gobiernu andorranu a reconocer y normalizar los derechos de los trabayadores, ello énte la realidá d'un país onde ye preciso pasar un reconocimientu médicu pa poder facese con un permisu de trabayu, según denunció la "Asociación de Médicos Progresistes" y onde, acordies colos informes de la Confederación Internacional d'Organizaciones Sindicales, dase na práctica una falta dafechu de derechos sindicales. Ello ye que, anque la constitución reconoz el derechu de los trabayadores a defender los sos intereses económicos y sociales, nun espeya'l derechu de fuelga nin fala de la negociación colectiva. Xunta esto, Andorra nun dispón de lleis que condenen la discriminación antisindical y amás, nel sector particular, permíte-yos a los empresarios el despidu ensin indemnización cola perda arreyada pal trabayador de toles prestaciones de Seguridá Social. Anque Andorra lleva tiempu prometiendo una reforma nesti sentíu, organismos internacionales denuncien que lleven años ensin dase avances.

Les reivindicaciones que los sindicatos andorranos, ente los que rescamplen y entre la Unión Sindical d'Andorra (USdA) y el Sindicat Andorrà de Treballadors (SAT) quieren que se sientan n'España y Francia pa forzar al Estáu andorranu a facer una llexislación qu'espeye los principales derechos llaborales llegaron esti pasáu 1 de mayu en Barcelona, onde la manifestación del 1 de mayu tuvo la cuestión andorrana como ún de los sos puntos principales.