Los sindicatos d’enseñanza preparen movilizaciones pola situación del asturianu nel currículum educativu

Los sindicatos d'enseñanza asturianos siguen cola esixencia de que la Conseyería d'Educación abra una mesa de negociación sobre'l currículum d'enseñanza del asturianu. Según comentaron a Asturies.com fontes sindicales, la última ufierta dende la Conseyería iguala'l tratu de l'asignatura de llingua asturiana col de l'asignatura de relixón, anque calteniendo una ratio mínima de 10 alumnos pa que s'imparta la materia.

Les organizaciones sindicales llamenten que la propuesta d'Educación pa primaria caltenga les ratios y tamién entienden que mientres la "atención educativa"alternativa a esta enseñanza ta controlada nel casu de relixón al traviés de los convenios col Vaticanu, nel casu del asturianu nun existan potencialmente mecanismos de control claros.

Énte esta situación, que sigue faciendo del asturianu una asignatura "voluntaria condicionada" en primaria y que caltién el so estatus d'opcional en secundaria, y énte la falta d'apertura de negociaciones directes por parte d'Educación, el siguiente pasu que van dar les organizaciones sindicales va ser la convocatoria pal día 18 de mayu d'una asmblea siguida d'un encierru nun centru educativu de la capital asturiana.