Los sindicatos d'enseñanza dexaron l'encierru na sede de la Conseyería

Representantes sindicales de les organizaciones CC OO, Suatea y CSI-CSIF abandonaron l'encierru que fexeron na sede de la Conseyería d'Educación y col qu'esixíen que s'abrieren negociaciones pa tratar los conteníos de la "carrera docente". Los sindicatos espliquen que l'abandonu "temporal" del encierrru ye una amuesa de bona voluntá dempués de que'l director de Recursos Humanos de la Conseyería d'Educación comprometiere una reunión de los Sindicatos col Director Xeneral de la Conseyería d'Economía y Alministración Pública, pa entamar un procesu de negociación qu'aporte soluciones al conflictu. Sicasí, anque entienden que la presión entama a frutiar, los sindicatos alvirtieron qu'esti vienres 22 diben volver a concentrase a la 1 de la tarde na Plaza d'España d'Uviéu, a la puerta de la Conseyería. Los tres sindicatos refuguen la propuesta de carrera docente.