Los sindicatos afirmen que’l siguimientu de la fuelga xeneral nel país foi mayoritariu

UXT, CC OO y USO afirmaron que’l siguimientu de la fuelga n’Asturies foi del 89 por cientu. Ésta ye una de les cifres más altes del Estáu, namái superada por Euskadi (95 por cientu), Navarra y Galicia (90 por cientu).
 
La media a nivel estatal foi del 77 por cientu, siendo los territorios con un menor apoyu al paru xeneral convocáu ayeri, aparte de les dos ciudaes autónomes (Melilla, un 48 por cientu, y Ceuta, un 58), Aragón y Castilla y Lleón, con un 65 por cientu de siguimientu. Pa los sindicatos mayoritarios la fuelga nel país foi “un ésitu rotundu”. "Un exemplu mui claru ye que’l consumu eléctricu n’Asturias cayó al 24 por cientu, una cifra similar a la que se dio na fuelga xeneral del añu 2002 contra’l Gobiernu de José María Aznar", señaló Antonio Pino, secretariu xeneral de Comisiones Obreres (CC OO), que destacó la participación alta nos seutores estratéxicos. Los sindicatos destacaron que’l paru foi total nos servicios de llimpieza y del 80 por cientu nel sector de la banca, seguros y alministraciones públiques. Pino tamién destacó que la fuelga foi "total" na industria, na minería y nos seutores químicu y enerxéticu.
 
Pela so parte, el responsable de la Unión Xeneral de Trabayadores d’Asturies (UXT), Justo Rodríguez Braga, resaltó’l siguimientu altu d’esta fuelga xeneral por parte de los trabayadores y reivindicó los motivos que llevaron a los sindicatos mayoritarios a convocar el paru. Asina, esixe al Gobiernu estatal que reflexone y qu’abra un procesu de negociación colos axentes sociales similar al que’esistía col Executivu socialista anterior. Por último, Francisco Baragaño, secretariu xeneral de la Unión Sindical Obrera (USO), agradeció a tolos trabayadores la so "valentía y coraxe" por apoyar una fuelga xeneral con "la espada de Damocles del despidu sobre la so cabeza tres la reforma llaboral", y agradeció tamién l’esfuerzu de los pequeños empresarios y los autónomos por zarrar los sos negocios "de manera llibre".
 
Asturies salió a la cai
 
La xornada de fuelga, que tuvo marcada pol bon tiempu, trescurrió con normalidá y ensin incidentes de trescendencia. La nota más destacada foi la participación alta nes dos manifestaciones convocaes nel país. En Xixón, alredor de 15.000 persones acudieron a la llamada de los sindicatos CSI, SUATEA y CGT, mentes que na de los sindicatos mayoritarios, celebrada n’Uviéu pela tarde, participaron 100.000 ciudadanos.