Los sindicalistes Cándido y Morala denuncien a un axente de la policía por dar testimoniu en falso

Los sindicalistes de la Corriente Sindical d'Izquierdes (CSI) Cándido González Carnero y Juan Manuel Martínez Morala presentaron ayeri una denuncia acusando de falsu testimoniu y d'otros delitos contra ún de los funcionarios del cuerpu de policía que testificaron en contra d'ellos nel xuiciu por daños nes movilizaciones llaborales del sector naval celebráu'l pasáu 30 de xineru. Cándido y Morala aseguren que'l policía "mintió" y que foi "arrémente en contra d'ellos".

Los dos sindicalistes identificaron al axente de policía denunciáu, que declarare nun conocelos más que polos fechos que se xulgaben, como "infiltráu" en manifestaciones antiglobalización celebraes nel añu 2001, apurriendo como preba gráfica dos semeyes nes que'l supuestu axente de policía apaez retratáu con ellos nes manifestaciones que se fexeron contra'l cume del Bancu Mundial en Barcelona, el 24 de xunu del 2001. Cándido y Morala aseguren qu'esta persona participó en reuniones del so sindicatu y que viaxó con ellos nel autocar que punxere la CSI pa participar naquelles protestes.

Cándido y Morala aseguren que la persona a la qu'acusen mandóse en tou momentu por una actitú "radical y violenta", convidando a los demás participantes na espedición de CSI a participar n'actos violentos, según diz la denuncia, na que s'acusa al supuestu axente de dar testimoniu en falso y de protagonizar desórdenes públicos, ente otros delitos.

Los dos sindicalistes punxeron tamién un escritu en delegación de Gobiernu en que-y piden al titular d'esti departamentu, Antonio Trevín, qu'abra una investigación sobre'l particular.
La web del sindicatu CSI reproduz el testu íntegru de la denuncia.