Los sectores críticu y oficial d’IX amenácense con llegar a los tribunales

Énte la decisión d'IX d'Asturies de nomar una xestora pa llevar alantre l'agrupación uvieina de la coalición d'izquierdes y la oficialización por parte d'esta xestora d'una llista electoral nueva pa Uviéu, l'agrupación d'Izquierda Xunida d'Uviéu aseguró que va defender "por tolos medios" la so candidatura a las elecciones al conceyu uvieín, qu'encabeza'l conceyal y lider históricu de la formación na capital asturiana, Roberto Sánchez Ramos.

Ramos y el dirixente d'IX d'Uviéu Francisco Asís espliquen qu'hebo delles actuaciones de la so agrupación que nun sentaron bien na dirección de la formación, ente elles la so defensa de los sindicalistes Cándido González Carnero y Juan Manuel Martínez Morala, l'oponese a una subestación eléctrica en Grau o l'oponese tamién a la construcción del centru d'arte Óscar Niemeyer d'Avilés por ser un "exaltamientu de la monarquía".

Los dirixentes d'IX d'Uviéu descarten presentase baxo la sigla del Partíu Comunista d'Asturies porque aseguren que'l PC yá se autoescluyó d'usar les sos sigles n'elecciones, polo qu'aseguren que van lluchar pol so derechu a presentase baxo la sigla IX.


Dende l'otru sector enfrentáu dientro de la organización, la secretaria xeneral del Partíu Comunista d'Asturies (PCA), Noemí Martín, ve la mano de la dirección del PCE qu'encabeza Francisco Frutos tres de la polémica con Uviéu y écha-y la culpa a Frutos de "querer estrozar la organización n'Asturies" col oxetivu d'echar de la dirección d'IX a Gaspar Llamazares. Martín, qu'aseguró que la dirección del PCA qu'ella representa ta dimpuesta a llegar a los tribunales, calificó de "fracasu" la convocatoria pa esti sábadu d'una repetición del congresu del PCA, asegurando que namás van participar nelli cerca de 100 militantes contra los más de mil que participaren nel anterior.