Los responsables de normalización nos conceyos ven que’l serviciu ta "desmontándose adulces"

L'Asociación de Trabayadores de la Normalización Llingüística, qu'axunta a los responsables de les oficines encargaes de la promoción y normalización nos conceyos asturianos emitió un comunicáu de prensa pa dar a conocer la situación en que s'alcuentra la rede d'oficines en que desempeñen les sos funciones. En primer llugar, l'Asociación denuncia que, amediáu yá'l mes de marzu "de les diez Oficines que trabayaben a 31 d'avientu del añu 2005 namás hai seis n'activo, quedando cuatro conceyos ensin serviciu de normalización" dempués de qu'escosaren los contratos de los responsables de los servicios y nun se renovaren. L'Asociación culpa d'ello "a la dexadez lo mesmo de los responsables políticos de los Conceyos que de la Conseyería de Cultura" y asegura qu'ello va suponer un dañu grave nes polítiques de normalización que tuvieren entamaes en cuantes que "nestos conceyos nun se contó col asesoramientu de los técnicos pa planificar la política llingüística, acabándose'l plazu de les subvenciones pa la normalización del asturianu nos conceyos que na mayoría de los casos ye la única fonte de financiación pa facer política llingüística".

Avilés, Samartín del Rei Aurelio, Llangréu y Mieres son los conceyos onde nun hai agora mesmo serviciu de normalización, ello anque, según asegura l'Asociación de Trabayadores "esiste un compromisu alquiríu col Principáu de tener la oficina abierta nel añu 2006". L'Asociación califica de "actu d'irresponsabilidá'l que dende los Conceyos nun sepan o nun quieran saber en qué consiste'l procesu de normalización llingüística" y aseguren que se trata d'un llabor que necesita d'años de planificación y de compromisu claru pa cola llingua asturiana.

L'Asociación denuncia igualmente a l'alministración asturiana amás de la local, y asegura que "la Conseyería de Cultura nun fai nengún tipu de siguimientu d'estes ayudes que nun cumplen colos oxetivos pa los que se crearon" y apela a la responsabilidá del Gobiernu del Principáu d'Asturies pa dar con una solución que garantice la continuidá y estabilidá de los Servicios de Normalización. El funcionamientu d'estes oficines, que depende nos más de los casos de subvenciones qu'entrega Cultura, carez de garantíes de continuidá y compromisu de la Conseyería, polo que l'asociación tien pa ella que "queda demostrao que la solución qu'ufre la Conseyería de Cultura p'afitar estes Oficines y pa reforzar la Rede de normalización nos conceyos ye ineficaz dafechu" al empar que ve como "les Oficines tán desmontándose adulces ensin que naide dea nenguna esplicación".

La falta de seriedá y rigor de los procesos de selección de trabayadores pa los Servicios ye otra de les quexes de l'Asociación, qu'asegura que "nun se cumplen unos requisitos serios y mínimos de selección que l'Asociación punxo en conocimientu de la Conseyería de Cultura". A l'Asociación abúlta-y que "ye necesario polo menos una prueba oral y otra escrita n'asturianu, amás d'un temariu definíu d'antemano".