Los profesionales del asturianu denuncien la “hipocresía” de Riopedre

L'Asociación de Trabayadores de la Normalización Llingüística emitió ayeri un comunicáu en que critica les últimes declaraciones del conseyeru d'Educación José Luis Iglesias Riopedre sobre la escolarización billingüe, que calificaron de "insultu". Riopedre, cuestionáu polos colectivos de defensa del asturianu, prometiera triplicar les aules billingües castellanu-inglés

L'asociación formada polos trabayadores y responsables de les oficines y organismos de normalización del asturianu del país recuérda-y a Riopedre que'l que l'alumnáu matriculao en clases billingües saque meyores notes, "ye cosa que yá se sabía dende va tiempu" y asegura que "lo hipócrita ye que s'atreva a dicir eso, un conseyeru que nun acaba de solucionar los problemes de la escolarización n'asturianu, que nun garantiza'l derechu individual de los escolinos y escolines a estudiar asturianu, siempre dependiendo de ratios y de la voluntá de dalgunos profesores, que tien a la llingua asturiana como optativa en secundaria vulnerando la voluntariedá de la que fala l'Estatutu d'Autonomía y con la mayoría de les escueles concertaes ensin cumplir la llei, como'l casu de Loyola n'Uviéu que yá denunciemos va unos meses".

Pal colectivu resulten "insultantes" les últimes declaraciones del conseyeru d'educación, "al nun ser que nun considere al asturianu como una llingua, que tal paez viendo como actúa".

Los profesionales del asturianu píden-y a Riopedre que la so conseyería "cumpla cola llei y que cumpla la promesa que ficiera va años publicamente de que l'asturianu diba empezar a ser llingua vehicular na enseñanza p'acabar de verdá cola discriminación llingüística y los escolinos y les escolines que voluntariamente quieran, puedan tener una educación de calidá y n'asturianu". El comunicáu remata reconociendo que "Paeznos bien que los neños y les neñes d'Asturies puedan estudiar n'inglés o francés pero eso nun quita pa que tamién tengan el derechu a facelo n'asturianu y ensin nengún tipu de discriminación".