Los Picos d’Europa tuvieron más de dos millones de visites nel 2004

El Patronatu de los Picos d'Europa aconceyó ayeri en Santander y dio a conocer el númberu de visites al espaciu natural. El Parque Nacional de los Picos d'Europa recibió nel añu 2004 un total de 2.221.761 de visites, un 11,6 más que nel 2003, cuando'l parque raspió los dos millones de visites.

Más de la metada de les visites entraron al parque per Cuadonga, que sigue siendo'l puntu d'entrada al Parque Nacional pel qu'entra más xente, un total d'un millón cien mil visitantes, pero llama más l'atención l'altísima estacionalidá de los mesmos. Dicho d'otra manera, solo nel mes d'agostu xubieron pela carretera a los llagos 332.000 persones, más de la cuarta parte del total. El teleféricu de Fuente Dé, na Llébana, ye'l segundu puntu con más entraes al parque recibiendo 684.560 visitantes nun añu, mientres que la entrada per Cabrales rexistró más de 286.000 visites en 2004. La entrada per Lleón sigue siendo la que menos visitantes tien, con dalgo menos de 138.000 accesos per aquella parte, anque, proporcionalmente, tolos accesos presenten el mesmu fenómenu d'estacionalidá, que fai que'l mes d'agostu entren al parque miles d'automóviles particulares