Los partíos entamaron la reforma del Estatutu d'Autonomía

El procesu de reforma del estatutu d'autonomía d'Asturies entamó ayeri formalmente cola constitución de la ponencia encargada de la reforma compuesta polos representantes de los tres grupos parllamentarios, qu'aconceyaron ayeri a les doce de la mañana no que suponía l'entamu formal de les negociaciones.

Pela parte del PSOE, el secretariu xeneral de la FSA y diputáu Javier Fernández, aseguró que los socialistes aborden el trabayu de reforma del Estatutu pensando qu'esti debe ser "un espaciu pal alcuerdu y non pa la confrontación". "Tamos dispuestos a trabayar con concesiones y con altura de mires, porque esti tien de ser l'Estatutu de tolos ciudadanos", dixo Fernández, que manifestó que'l so grupu llega "abiertu a la negociación" y les sos posiciones son "sólides pero "flexibles". "Hai un marxe pa la flexibilidá que nós vamos agotar y esperamos que'l restu de los grupos también", dixo Fernández, qu'añadió que tol mundiu ye consciente d'ónde van a dar los mayores puntos de diferencies.

Dende'l PP Ovidio Sánchez, aseguró que la reforma "tien de ser "participativa" y na mesma tien de tar presente "tola sociedá asturiana, alcaldes, instituciones y organizaciones que quieran aportar les sos aspiraciones y la forma tien de dar dar respuesta a los problemes". "El puntu final de la reforma tien de ser un gran respaldu por parte de los ciudadanos", dixo Ovidio Sánchez, qu'añadió que "el final tien de ser un gran referéndum ciudadanu".

Finalmente,el coordinador xeneral d'IX-BA-LV y diputáu del grupu parlamentariu de la coalición, Jesús Iglesias, aseguró que la so agrupación felicítase por entamar los trabayos d'ellaboración d'un nuevu estatutu p'Asturies. "El Principáu por voluntá de les fuercies polítiques mayoritaries incorpórase al procesu de reforma estatutaria, anque esperamos que se faiga cola suficiente voluntá y enerxía que garantice l'Estatutu qu'Asturies necesita", dixo Iglesias, que pidió un Estatutu "que reconoza la historia d'Asturies y la so identidá, qu'espeye la posiblidá de que los asturianos tengan reconocencia de nuevos derechos civiles y sociales, qu'incorpore competencies, y que den más capacidaes al gobiernu asturianu, qu'incorpore la culminación del procesu de configuración de los órganos políticos d'Asturies y que reconoza la oficialidá de la llingua".

A la mesma hora que se reuníen los políticos, a la puerta del palaciu del parlamentu asturianu, los manifestantes de la Xunta Pola Defensa de la Llingua concentrábense pa reivindicar la inclusión nesta reforma de la oficialidá de la llingua asturiana na llei orgánica de l'autonomía asturiana. Dende la Xunta esplicose como, mientres "los grupos parllamentarios plantegaron esi primer aconceyamientu como un actu simbólicu, de presentación a los medios del aniciu del procesu de reforma estatutaria, la presencia de los activistes a la puerta de la Xunta Xeneral permite facer una semeya bien descriptiva del futuru desarrollu d'esti procesu" que nun va ser otra, según la organización, que la de "la reivindicación ciudadana de la oficialidá, que va ser la verdadera protagonista". La organización alvierte que "tamos entrando nun periodu que va ser determinante y nel que'l futuru de la llingua asturiana va decidise nos prósimos meses".