Los músicos asturianos protesten contra la precariedá llaboral

Dempués del durísimu comunicáu qu’asoleyaren esta mesma selmana los miembros del grupu "Felpeyu" nel que cargaben contra'l conceyal de cultura de Corvera, Luis Solares pol mal tratu que-yos diera na nueche de San Xuan del añu 2006, una actuacíon que Felpeyu nun pudo dar y que tampoco cobró. Los miembros del grupu avisaren de la convocatoria d'una rueda de prensa pa esti xueves na que diben dar más información y na que, finalmente, más de venti músicos asturianos espresaron el so sofitu a Felpeyu na so denuncia contra Solares, actualmente candidatu a l'alcaldía de Corvera pol PP al mesmu tiempu que criticaron el marcu de precariedá llaboral en que se desarrolla'l llabor de los músicos asturianos.

Músicos de los grupos Tejedor, Corquiéu, Dixebra o La Bandina, el guitarrista Rafa Kas, Corquieu o'l cantante Vicente Díaz, entre otros, asistieron a la rueda de prensa na que los miembros de Felpeyu esplicaron que si cobren el caché pola actuación d'aquella nueche, la so intención ye donalu a la Escuela de Música de Corvera pa que vuelva a ser pública dempués de que la privatizare l'equipu de Gobiernu del PP. Casu de nun poder facer la donación, les perres del cobru del caché del grupu diríen como fondos pa una Asociación de Músicos "que represente los nuestros intereses" en palabres de Diego Pangua.

Los "felpeyos" denunciaron que nos más de los casos, les actuaciones contrátense ensin documentos firmaos nin seguros pa los músicos, existiendo namás compromisos verbales ente les partes. Una práctica que pa la familia musical asturiana ye preciso desaniciar.