Los Locos vuelven a l'actualidá con una reedición

El dúu formáu por Paco Martínez y Carlos Redondo vuelven a ser noticia cola edición d'una caxa compilatoria.

"Los Locos" fueron ún de los grupos más importantes na escena del pop asturianu y estatal. El so estilu senciellu y directu de pop clásicu llegó bien a un públicu que daquella yera un bon receptor d'esti estilu. Dende va unos años el grupu ta desfechu, pero agora gracies al sellu "Dro" volvemos a tener nes tiendes de tiendes de música los cantares de "Los Locos".

Esta caxa ta formada polos discos "Los Locos" (1987), "El segundo de Los Locos" (1988) y "Algo Salvaje" (1991). El primer y el terceru foron producíos por René de Coupaud y grabaos nos estudios Eolo de Xixón, tan frecuentaos polos grupos folk asturianos. El segundu grabóse en Madrid cola producción del conocíu músicu y collaborador habitual de Joaquín Sabina, Antonio García de Diego.

Nesta caxa podemos sentir cantares míticos del grupu como "Detrás de la verdad" , "Cebo para otros brazos" , "Lección de baile" y "Algo salvaje", y vien a sumáse dos compilatorios publicaos va seis y ocho años, "Sus mejores locuras" y "Singles".

Anque la banda tea desfecha, los sos componentes siguen n'activo. Paco Martínez "Paco Loco" ye un conocíu productor de la escena indy, anque n'Asturies tamién fizo les sos incursiones nel folk produciendo "Inda ya ceu" de "N'Arba" o una remasterización de "Asturalia" pa "Dixebra" nel discu de la Xunta Moza "L'Asturianu vive, la llucha sigue", na faceta de músicu agora mesmu ye componente de "Australian Blonde". Carlos Redondo "Carlos loco" ye más conocíu na escena folk por ser cantante y guitarrista en "Felpeyu", amás ta acabante montar un nuevu sellu llamáu "Tierra Discos" xunto col bouzouky y cantante de "Felpeyu" Ígor Medio.