Los independentistes del SNP gobernarán Escocia tres vencer nes elecciones

Les elecciones del pasáu 3 de mayu a los parlamentos autónomos d'Escocia y Gales conseñaron un reblagu de les opciones nacionalistes n'ambos países, anque foi enforma significativu n'Escocia, onde los independentistes del Scottish National Party (SNP) algamaron 47 escaños, xubiendo 20 escaños en relación a les anteriores elecciones, convirtiéndose asina na primer fuerza nel parlamentu escocés. D'esti mou'l SNP será l'encargáu de gobernar en minoría'l país los próximos 4 años con un programa que tien como exe central la convocatoria d'un referendum d'autodeterminación. Pela so parte nel País de Gales repitieron victoria los Llaboristes, mientres que los nacionalistes del Plaid Cymru continuen como segunda fuerza.

Los resultaos de les elecciones al parlamentu escocés dieron-y la mayoría anque por un solu diputáu a los independentistes encabezaos por Alex Salmond. Asina, el SNP llegó a los 47 esacaños, xubiendo vente en relación a 2003. Los Llaboristes perdieron 4 asitiándose en 46 diputaos. La tercer fuerza fueron los Consevadores con 17 mientres que los Lliberal-Democrates algamaron un total de 16. El parlamento escocés fórmenlo 129 diputaos, polo que'l SNP deberá gobernar en minoría apoyándose puntualmente n'otros partíos como'l Lliberal o Los Verdes escoceses, qu'obtuvieron 2 escaños. El gobiernu de coalición ente los nacionalistes, los Verdes y los Lliberales paez descartao dafechu pola negativa d'estos últimos a celebrar un referendum d'autodeterminación. En Galés en cambio van ser los Llaboristes los que continuen gobernando'l país, ya que anque perdieron 4 escaños continuen siendo la primer fuerza con 26 diputaos. En segundu llugar asitien los nacionalistes del Plaid Cymru, que ganaron 3 diputaos polo que van ocupar 15 asientos n'Asamblea galesa. Conservadores y Lliberales algamaron 12 y 6 escaños respectivamente.