Los grupos parlamentarios nomaron a los sos representantes pa la reforma del estatutu

La Xunta de Portavoces de la Xunta Xeneral del Principáu designó ayeri nuna reunión especial a los representantes de los grupos parlamentarios (PSOE, PP y IX/BA/LV) na Ponencia estatutaria que va abordar la ellaboración del nuevu testu pa la reforma del Estatutu d'Autonomía d'Asturies, según s'informó dende la Xunta Xeneral.

Los diputaos designaos pol Grupu Parlamentariu Socialista son Javier Fernández Fernández, Fernando Lastra Valdés y Elena Díaz Palacios. Pela so parte, el Grupu Parlamentariu Popular va tener de representantes a Ovidio Sánchez Díaz, Joaquín Aréstegui Artime y Reinerio Álvarez Saavedra, y p'acabar los diputaos designaos pol Grupu Parlamentariu d'IX-BA-LV son Jesús Iglesias Fernández, Noemí Martín González y Francisco Javier García Valledor.

Los nomamientos de los ponentes tuvieron llugar xusto'l día enantes de qu'entame na Xunta Xeneral el Debate d'Orientación Política, debate añal sobre l'estáu de l'autonomía asturiana que va arrancar güei martes col discursu del Presidente asturianu Vicente Álvarez Areces. L'aprobación de les cuentes asturianes pal 2008 va presidir el debate, nel que la formación IX-BA-Verdes yá alvirtió que va aprovechar la ocasión pa criticar la "derechización del gobiernu Areces" polo que pinta que va haber un debate tensu al precisar los socialistes del apoyu de los sos antiguos socios de gobiernu pa l'aprobación del presupuestu.