Los escolinos d’Infantil del Santiago Apóstol de Mieres, ensin asturianu magar les demandes del centru

|
CP Santiago Apóstol de Mieres

Cuasi’l 100 por cien de les families de los escolinos d’Educación Infantil del CP Santiago Apóstol de Mieres solicitó recibir l’enseñu de Llingua Asturiana esti cursu. Por contra, nun tán dando asturianu pola contratación d’un maestru a media xornada frente a la demanda de la direición del centru de contar con ún a tiempu completu.

El Sindicatu Unitariu Autónomu de Trabayadores de la Enseñanza d’Asturies (SUATEA) denuncia esta situación que se viven nesta escuela mierense d’Educación Infantil y Primaria. “Esta forma d’actuar ye contraria a derechu y atiende esclusivamente a criterios economicistes de recortes nel gastu a costa de los derechos de los padres y madres. Vulnera la Llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu”, esplica nun comunicáu.

El Santiago Apostol “lleva impartiendo estes enseñances na Educación Infantil dende hai una montonera años” y dende’l sindicatu nun entienden “qu’un Gobiernu que va promover la reforma del nuestru Estatutu Autonomía pa que recueya la oficialidá de les nuestres llingües siga actuando activamente contra los derechos llingüísticos de la ciudadanía yá recoyíos na normativa asturiana”. Por esti motivu sofiten la demanda de la direición del centru y de l’Asociación de Padres y Madres, y esixe “l’ampliación de la xornada llaboral de la persona contratada pa impartir enseñances de Llingua Asturiana de media a completa pa poder atender a tol alumnáu d’Educación Infantil”.

Semeya propiedá del Conceyu de Mieres.

Contador Estadistiques