Los diputaos de la Xunta ficieron teatru n'asturianu

La Xunta Xeneral del Principáu foi escenariu ayeri, por segundu añu, del actu de llectura de testos n'asturianu por parte de los diputaos del parlamentu asturianu, dientro de los eventos de la "Selmana de les Lletres Asturianes".

La presidenta de la Xunta Xeneral María Jesús Álvarez entamó la llectura con un estractu de la obra costumista "Les llinguateres", d'Emilio Palacios, pero la parte que más sorprendió foi la llectura dialogada ente la Conseyera de Cultura Ana Rosa Migoya, y el Director Xeneral de Promoción Cultural y Política Llingüística, Carlos Madera, d'un pasaxe románticu de la obra "Nel y Flor" del clásicu Pin de Pria.

El líder de la oposición, el popular Ovidio Sánchez, atrevióse con un párrafu de "Antígona, por exemplu" de Nel Amaro. Pela so parte, la representante d'IX-BA Noemí García atacó "Palabres de Viéspora" d'Álvaro Cunqueiro y el portavoz socialista Fernando Lastra lleó "El bañu", una traducción de Federico Fierro-Botas, mientres que'ldelegáu del Gobiernu Antonio Trevín "barrió pa casa" con un testu de la obra "Réplica" del llaniscu Ánxel de la Morea.