Los conceyos asoleyen les llistes del censu electoral

Dende ayeri llunes 9 d'abril, y hasta'l próximu llunes día 16, los conceyos asturianos esponen públicamente les llistes del censu electoral pa les votaciones autonómiques y a conceyos del próximu día 27 de mayu. cerca d'un millón de persones tán llamaes a participar nestes votaciones, encamentándose la consulta de los datos pa facer les reclamaciones y igües precises y asina evitar problemes a la hora d'exercer el derechu al votu.

Más de 981.000 persones tán llamaes a les elecciones asturianes, de les que cerca de 65.000 viven na emigración. El voto del estranxeru ye más importante que nunca nunes elecciones nes que la masa total de votantes emigrantes equivaldría a un teóricu cuartu conceyu más grande d'Asturies. Nel casu de la circunscripción oriental, el quintu diputáu que sal per ella podría decidilu'l votu emigrante, que representa'l 20% del total del censu.

Más del 50% de los votantes censaos pal 27 de mayu son muyeres, mientres que la estaya d'edá más numberosa ye la que ta ente los 45 y 49 años, con 83.109 votantes censaos, siendo'l segundu bloque d'edá más numberosu'l de los de 30 a 34 años, con 80.148 persones. Cerca de 37.000 asturianos y asturianes van poder exercer el drechu al votu por primer vegada nestes elecciones de mayu, que yá tienen abiertu'l plazu tamién pa solicitar el votu per corréu hasta'l 17 de mayu.