Los candidatos a la presidencia d'Asturies centraron el pieslle de campaña electoral na crítica a los sos contrarios

Los candidatos socialistes a la presidencia asturiana y l'alcaldía d'Uviéu, Vicente Alvarez Areces y Paloma Sainz, pesllaron la campaña del PSOE faciendo un llamáu a los ciudadanos a acudir el domingu a les urnes. Persabiendo que les baxes tases de participación electoral suelen beneficiar al PP, el diputáu socialista Alvaro Cuesta aseguró que'l PP namás s'enfota en "ganar cola abstención". Les crítiques a les otres dos grandes formaciones centraron el pieslle de campaña socialista, atacando Areces a Gabino de Lorenzo pol "esperpentu vergoñosu" que protagnizó n'Uviéu al salir a un mitin mazcaráu pa facer burlla del proyectu socialista d'un tranvía pa Uviéu. Más directu foi Javier Fernández colos sos socios de gobiernu hasta agora, IX-BA-LV, a los qu'acusó de "agredir" al PSOE. Pa Fernández "esi partíu que se llama d'izquierda real, tresformadora y asturianista" anda yá "col vademécum y planteando esixencies" y "por muncho que se digan tresformadores quien tresforma de verdá la sociedá somos los socialistes, que ye a quien vota la xente".

Pela so parte, el candidatu del PP a la presidencia asturiana, Ovidio Sánchez, peslló la campaña ofreciéndó-y al electorau "ilusión y esperanza" contra la "resignación" del actual presidente y candidatu pol PSOE. Nel actu de pieslle de campaña popular en Villaviciosa, Sánchez echó per Areces, al qu'acusó de llevar Asturies a un estáu de "pesimismu xeneralizáu" y enfotóse na existencia d'un electoráu que "pide un cambéu".

Nel so pieslle de campaña, el candidatu d'IX-BA-LV, Jesús Iglesias defendió les opociones de la so formación en cuantes que foi la única que defendió un proyectu d'Asturies na campaña contra'l discursu centráu en polítiques d'estáu de PSOE y PP, y siempre con una visión "posada" y d'impulsu a la "cohexón social y territorial". Iglesias refugó la idea de que los populares puean ganar les elecciones y esplicó que ye preciso que la so formación "gane fuerza" nestes elecciones pa que'l próximu gobiernu "sía más d'izquierdes".

Más de 200 persones axuntó la coalición URAS-PAS nel so actu de pieslle de campaña en Xixón, nel que Sergio Marqués y Xuan Xosé Sánchez Vicente. La emigración de la mocedá asturiana, lea defensa de les figures del autónomu y el pequeñu empresariu, xunto cola de les señes culturales asturianes centraron un discursu en que Sánchez y Marqués definieron la so opción como "la única que realmente defende los intereses de los asturianos". Sánchez Vicente cargó nel so discursu contra la política del gobiernu d'Areces , del que declaró que nun tenía más enfotu "que lu declararen ministru pa marchar d'Asturies" en contraposición a Sergio Marqués, al que punxo d'exemplu de compromisu con Asturies. El presidente del PAS albidró nerviosismu nes files del PSOE énte'l resultáu electoral.

Ente los últimos en pesllar la campaña tuvo la coalición Unidá, que celebró en Piloña un mítin - conciertu colos grupos Llangres y Skama la Rede. Na parte política, na que tamién participó'l candidatu a l'alcaldía José Ángel García "Allende" les intervenciones de Germán Abad, candidatu pol oriente, y Ignaciu Llope, candidatu pola circunscripción central, centráronse na defensa de la so opción como un "votu útil" contra les conseñes d'otres opciones que se calificaron como tal a lo llargo de la campaña. La crítica a les polítiques del gobiernu de coalición de la llexislatura qu'acaba y contra la "supuesta alternativa" del PP que sedría "más de lo mesmo" centraron el pieslle de campaña d'esta coalición d'izquierda nacionalista y ecoloxista.