Los Berrones y Misiva son parte del 'compangu' musical del FICAL

18 cerveceres de dientro y fuera d’Asturies van participar esta fin de selmana nel Festival Internacional de Cerveza Artesano de Llangréu (FICAL).

El certame, nel que la música tien munchu protagonismu, presenta un ampliu programa de conciertos con presencia de bandes como Los Berrones, Misiva, La Morgue o Saratoga.

Un añu más los Xardinos de la Pinacoteca Eduardo Úrculo, en La Felguera, van acoyer los díes 12, 13 y 14 d'abril meses llargues, puestos de cerveza y escenarios pa ufrir a los visitantes trés díes de folixa alredor d’esta bébora.

Les llangreanes Caleya y Asturias Brewing Company amás de Grisú (Mieres) y D'equí (Cualloto) son los representantes del país d’una llista d’ellaboradores que completen La Grúa, Dougall's y Redneck, de Cantabria; Naparbier, Laugar y Saltus, d’Euskadi; Garage y La Pirata, de Catalunya; Sanz y Son, de la Comunitat Valenciana; San Frutos, de Castilla; Málaga 3 Monos, d’Andalucía; Salama, de Finlandia; Funky Fluid, de Polonia; y Full Circle, d’Inglaterra.

Enar Roces, de Puru Remangu, va lleer el pregón del FICAL a les 19 hores del vienres, xornada na que van tocar Los Berrones (00 hores) y Misiva (01.30 hores), grupu que ta ufriendo los sos últimos conciertos. Completen esta primer xornada Rat Sabbath (20 hores), Flashback (21 hores), La Morgue (22.30 hores) y Soulvattore di Groove (3 hores).

El sábadu va visitar Llangréu el veteranu grupu de heavy metal Saratoga (00 hores), al que va siguir Me Fritos and the Gimme Cheetos (01.30 hores). Tamién van tocar esti día The Black Panthys Party (20.30 hores), Endernity (22.30 hores) y otra vuelta Soulvattore di Groove (3 hores), mentes que’l domingu va animar la mañana Pablo Valdés (13.30 hores).

Amás, a lo llargo de les trés xornaes va haber prebes, charres o proyeiciones. Como novedá, el FICAL, que tien accesu llibre, esti añu incorpora’l pagu nel recintu con pulserina recargable que s’ha mercar nel interior.

Semeya: imaxe d'archivu d'una edición anterior del FICAL