Los Berrones y Dixebra ponen la música al día grande del XII Mercáu Tradicional La Flor de Ḷḷena

Esta fin de selmana celébrense les fiestes de La Flor en Ḷḷena y, con elles, el XII Mercáu Tradicional nel barriu La Caleya de La Pola. Los Berrones y Dixebra van actuar el sábadu, mientres que’l domingu’l turnu ye pa Mapi Quintana y Elías García, Truequedart y Guzmán.

La Xunta Cultural Rebelgu entama un añu más esti mercáu tradicional qu’atrae tanto a persones de tol Conciyu Ḷḷena como del restu d’Asturies y inclusive Lleón. Mientres el sábadu y el domingu, La Caleya acueye una riestra d’actividaes pa tola familia ente les que destaquen esti añu una amuesa de races autóctones y otra de semeyes. Los más de 70 artesanos presentes van ufrir los sos productos dende les 10 hores de mañana, anque’l pregón nun se dará hasta les 11.30 hores. Al meudía ta prevista una actuación de la Banda Gaites Güestia y, pela tarde, a les 17 hores, del Grupo de Baile Xanzaina. Mentes, a les 22 hores, va dase’l platu fuerte de la fiesta: los conciertos de Los Berrones y Dixebra.

 L’actividá del domingu nel mercáu va principiar tamién a les 10 hores y, a les 13 hores, va centrase nel chigre astur por mor de l’actuación de Mapi Quintana y Elías García. Yá pela tarde, dende les 16.30 hores, van entamase xuegos y cuentacuentos pa la reciella, pa poner fin a la folixa en La Caleya cola actuación de Truequedart (20 hores) y una pinchada d’electro-folk a cargu de Guzmán (22 hores).

Actividaes nel restu del pueblu

Amás de la programación de la Xunta Cultural Rebelgu, el Conciyu de Ḷḷena tamién entama actividaes nel restu del pueblu dende güei mesmu col monólogu musical ‘Yo maté a Kennedy…, pero fue sin querer’, protagonizáu por Alberto Rodrígez (Teatru Vital Aza, 20 hores; 5 euros) y la primer verbena, que va trayer al Grupo Tekila al parque Alfonso X El Sabio. El restu d’orquestes previstes pa la folixa son el Dúo Fusión y la Orquesta Cañón (sábadu) y el Dúo Júcar y la Orquesta Dominó (domingu). El Vital Aza tamién va acoyer teatru mañana, nesti casu la pieza costumista ‘Caboneras’ (20 hores; 5 euros) del Grupu de Teatru Pausa, mentes que’l domingu va ser turnu pa la zarzuela ‘La fortuna del pianista (20 hores; 8 euros anticipada y 10, na puerta), representación de Zarzuelastur. Pa finar, el llunes celébrase la xuba al prau de La Flor, momentu más esperáu por ḷḷenizos y ḷḷenices de les fiestes.