Los Berrones axunten tola so discografía na "caxa azul"

"La Caxa Azul" ye'l nome col que se presenta al mercáu una
caxa qu'atropa tolos discos de la llarga carrrera musical de Los Berrones.
La casa de discos del grupu asturianu, Santo Grial Producciones, quier que la caxa azul sía'l
regalu d'estes navidaes, y pa ello esta edición vien con munches
sorpreses.



Dende que Los Berrones sacaren
el so primer discu allá per 1989 col espresivu títulu de "Voy Dicitelo (Fechu n'Asturies)" el
grupu trabayó abondo nos estudios y nos escenarios pa llegar a esti
final de 2005 con una carrera musical que llega yá a los 10 discos, un númberu reondu nel que cuenten tamién directos y ediciones
especiales, y que bien merez un homenaxe pequeñu. Esi ye l'oxetivu d'esta
caxa azul qu'inclui los discos d'esti grupu xunta un riestra de regalos como
son una camiseta de "fatu berrón" indispensable pa les "Fiestes de
Prau World Tour 2006", una gorra y hasta un paquete d'ablanes. El preciu d'esta
Caxa Azul ye perinteresante, namás que 29 euros, y pa facese con una va
haber que tar al tantu en cuantes que se trata d'una edición llimitada de 700 copies.