Los autores llamenten la falta de visibilidá del asturianu

La Biblioteca d’Humanidaes de la Universidá d’Uviéu acoyó la presentación de los llibros gallardonaos colos Premios Lliterarios 2013. La falta de visibilidá del asturianu ye ún de los asuntos que más esmolecen a los autores.

 

“Hai que reivindicar la presencia del asturianu nos medios públicos de comunicación. Ye dalgo que diba frayar munches barreres”, afirmó Beatriz Redondo Viado, ganadora del XIX Premiu Máximo Fuertes Acevedo d’ensayu por ‘Yá cuasi nunca lo facemos por amor. Conciencies mercenaries’ (KRK), nel alderique posterior al actu de presentanción, nel que tema de la visibilidá del idioma ocupó bona parte del tiempu. Enantes, Marisa López Diz, VI Premiu María Xosefa Canellada de lliteratura infantil y xuvenil con ‘Tatuaxes nel corazón’ (Impronta) entrugábase “pa quién escribimos” y, depués, Pablo Rodríguez Medina,  merecedor del XXXIV Premiu Xosefa Xovellanos de novela con ‘Fame d’amor, determín de pasión’ (Ediciones Trabe), trataba de dar una visión más optimista reconociendo que “el mundu de la cultura ye un mundu minoritariu”. La educación, concidieron públicu y escritores, ye una ferramienta mui necesaria p’avezar a les persones a lleer n’asturianu, puntu nel que les acusaciones al Gobiernu por torgar l’enseñu en Llingua Asturiana fixeron a Ana Fueyo, direutora xeneral de Política Llingüística, a defender que “nun prohibimos nada. Damos la oportunidá a tolos neños que quieran deprender asturianu a que s’apunten a clase de llingua”.

 

Precisamente Fueyo foi la encargada d’abrir l’actu d’ayeri, ún de los munchos programaos por mor de la XXXV Selmana de les Lletres Asturianes. Xunto a ella taba Cristina Valdés, que’l vienres va ser nomada académica de númberu xunto con Carmen Muñiz Cachón na xunta estraordinaria de l’Academia de la Llingua Asturiana nel Campoamor. La decana de la Facultá de Filosofía y Lletres destacó’l fechu de que cada vegada hai más escritores y estilos en llingua asturiana, dalgo qu’ayuda a dignificar l’idioma.

 

Dos ausencies por motivos profesionales

 

Tres estes intervenciones, garró’l relevu Vanessa Gutiérrez, que fixo de moderadora del eventu. Xunto a ella, Redondo Viado, López Diz y Rodríguez Medina, yá que los otros premiaos, Ricardo Candás (XIX Premiu Xuan María Acebal de poesía por ‘Superficie de silenciu’) y Alfonso Zapico (V Premiu Alfonso Iglesias de cómic con ‘Cuadernos d’Ítaca’) nun pudieron tar presentes por motivos profesionales. El primeru en tomar la pallabra foi l’escritu de Samartín del Rei Aurelio, que quixo agradecer “el valor” del xuráu por gallardonar una obra “que nun ye fácil de premiar”, asina como a Trabe “por ameyorar la novela” cola edición y a los llectores que-y animaron a escribir la segunda parte d’esta historia d’un profesor de Filoloxía estructurada “a la manera de la picaresca castellana”.

 

López Diz apuntó sobre ‘Tatuaxes nel corazón’ que “ye una obra pa un públicu adolescente” que cuenta la vida d’una moza de 15 años y les sos rellaciones cola familia y amigos. “Apetecióme esplorar esti terrén un poco peligrosu, desérticu”, añadió, en referencia a la escasez d’espublizaciones destinaes pa esti tramu d’edá. Pela so parte, Redondo Viado, en referencia al so ensayu, fixo una reflexón sobre’l papel del periodista y los medios de comunicación que tenemos y queremos nun momentu nel qu’éstos pasaron de ser “el cuartu poder a medios de parte del poder”. “Y en mediu, queda’l periodista, qu’acata directrices y fai lo contrario a lo que tien que facer”, afirma esta profesional que considera que los periodistes “han de ser suxetos activos del cambiu”.

 

Pese a nun poder tar presentes, tanto Candás como Zapico quixeron participar con dos escritos que lleó Gutiérrez, qu’agradeció a les editoriales por asoleyar unos trabayos “de grandísimia calidá a pesar de les prieses”. El poeta xixonés, autor de ‘Superficie de silenciu’ (Trabe), amosó’l so esmolecimientu pol baxu númberu d’obres presentaes al gallardón, “que nun pasa de la docena tolos años”. “Ye una participación probe. ¿Qué se fixo mal nesti tiempu si nun camudó la cifra de forma significativa?”, añadió en referencia a los casi trenta años que lleva’l Xuan María Acebal, pa depués señalar que “los y les escritores necesiten lleer” en tolos estilos, sobre manera les xeneraciones moces. Esta percepción de Candás retomóla Rodríguez Medina nel alderique posterior pa da-y un xiru optimista y apuntar “que si sumamos toles obres presentaes tolos años dan más de 200 poemarios nesti tiempu nuna llingua que pa munchos nun esiste. Ye un llogru siguir vivos”.