Los autobuses de nueche van circular tol añu ente Uviéu, Xixón y Avilés

El serviciu d'autobus de nueche ente les ciudades d'Uviéu, Xixón y Avilés va funcionar tolos sábados del añu y non solo los meses de branu, según informó ayeri'l conseyeru d'Infraestructures y Política Territorial, Francisco González Buendía. El conseyeru realizó estes manifestaciones na rueda de prensa qu'ofreció nel Edificiu de Servicios Múltiples pa presentar los servicios d'autobus pa la nueche de los sábados.

Buendía destacó que los autocares van ampliar les sos rutes y van estendese a les conexones Avilés-Xixón; Uviéu-Avilés; y Xixón-Uviéu, polo que les poblaciones más importantes del Principáu van tener conexión de nueche por tresporte público. Los horarios de los autobuses van ser de 23.00 hores a 6.00 hores. Respecto al preciu del billete, el director xeneral del consorciu de tresportes d'Asturies, José Luis Lamadrid, recomendó que la xente mozo use'l bonu o'l billete únicu porque d'esta manera "el viaxe va sali-yos de baldre".

Lamadrid aseguró que pel branu los resultaos del tresporte públicu de nueche espeyaron unos datos "perbonos" ya que nos meses de xunu, xunetu y agostu, foron 20.000 viaxeros los que ficieron usu d'esti serviciu. Asina, la llinia Avilés-Xixón tuvo cerca de 8.000 viaxeros; la llinia Uviéu- Posada, 650 persones; Uviéu-Siero-L'Infiestu, 1.000 pasaxeros y l'itinerariu que más viaxeros llevó foi'l de la Cuenca'l Nalón La Pola Llaviana-Villa (Riañu) con 14.000 viaxeros. Lamadrid calculó que l'ampliación de les rutes y los horarios van superar la movilidá de 50.000 viaxeros.

Como complementu a estos servicios, el Conseyu de la Mocedá presentó la campaña pa promocionar l'autobús nocturnu, que, en soportes como carteles, chapes, postales, videu y camisetes, va emplegar como imaxe al popular rostru de Henry Felgueroso, un taxista conocíu poles sos apaiciones nes películes del director Jim-Box que lu convertieron nun fenómenu en youtube.

Per otru llau, el conseyeru d'Infraestructures y Política Territorial, Francisco González Buendía, anunció que'l Consorciu de Tresportes del Principáu va entamar un serviciu de movilidá p'aquelles persones que nun tengan facilidá pa treslladase bien pola distancia, o bien poles sos condiciones físiques.
Buendía comentó que'l Principáu va ponese en contactu colos hospitales de Xarrio y Les Arriondes pa concretar los díes de consulta y asina treslladar a eses persones hasta los centros hospitalarios.
Los usuarios que lo quieran van tener d'informar al Consorciu de Tresportes con antelación apautando'l día y la hora a la que va necesitar esi tresporte y el Principáu va facilita-yos un vehículu que los va llevar de "puerta a puerta", apuntó Buendía.