Los asturianistes Humberto Gonzali y Chema Vega van representar al PP y IX-BA-LV nel RIDEA

El Real Institutu d'Estudios Asturianos va contar nesta llexislatura con dos representantes asturianistes nel so sén. Los escritores n'asturianu Humberto Gonzali y Xosé María Vega Blanco, conocíos pola so obra lliteraria y la so proyección pública, van representar respectivamente a les formaciones Partíu Popular y IX-BA-LV dientro d'esti organismu que tien ente los sos cometíos la investigación, el fomentu y la orientación de trabayos y estudios sobre la historia, ciencia, lletres y cultura asturianes en tolos aspectos, según confirmaron a Asturies.com los mesmos interesaos.

Nel casu d'Humberto Gonzali, el responsable de l'Arribada va encabezar la delegación de trés miembros del PP con derechu a asientu en RIDEA, mientres que Chema Vega va ser l'únicu representante de la coalición d'izquierdes nel institutu. Estatutariamente, una entidá de compromisu asturianista, l'Academia de la Llingua Asturiana cuenta tamién con un representante, cargu qu'ocupa Xosé Lluis García Arias.

El RIDEA convertiérase nuna institución polémica l'añu pasáu, cuando la so directiva, encabezada por José Luis Pérez de Castro, negóse a aceptar una ponencia redactada n'asturianu y que se presentó al "Congresu d'Estudios Asturianos" col que la institución celebraba los sos 60 años d'esistencia. Afitándose na independencia del Institutu, la directiva del RIDEA negó toa posibilidá de que la ponente, Yolanda Magdalena, pudiere lleer el testu, prendiendo un discutiniu qu'acabó con una concentración de protesta a la puerta de l'apertura del congresu.