Los arqueólogos descubren les muries del castillu de Gauzón

Los arqueólogos Alejandro García y Iván Muñiz entamaron esti mes una campaña d'escavaciones en Peñón de Raíces, llugar au se llevantaba na edá media'l Castillu de Gauzón, edificiu nel que se fexo, según tolos datos históricos, la Cruz de la Victoria allá pel añu 908. Una de les muries del edificiu quedó yá al descubiertu nos llabores que se tán faciendo sobre los restos.

El rei Alfonso III mandare llevantar el castillu de Gauzón a últimos del sieglu IX, ocupando'l llugar d'un antiguu castru que tenía poblamientu, que se sepa, a lo menos en dómina romana. L'edificiu, en primer llinia de costa, defendía la entrada a la Ría d'Avilés nun tiempu en que pueblos como los vikingos, coles sos campañes de guerra, suponíen una amenaza pal reinu astur. Asitiáu nel Peñón de Raíces en Castrillón, el castillu convertióse nel centru políticu y económicu d'una comarca que tomaba lo qu'agora son los conceyos de Gozón, Castrillón y Avilés, anque col pasu del tiempu perdió la so importancia militar. Nel sieglu XIII, el rei Alfonso X el Sabio cedió-y el castillu a la orde de Santiago, que lu vendió a primeros del sieglu XV. L'edificiu perdió entós tola so importancia al convertise la Villa d'Avilés nel nuevu centru de poder, y muncho de la so piedra aprovechóse pa construyir otres ilesies y edificios na contornada. Dende entós hasta agora, el Castillu de Gauzón convertióse nun de los misterios sobre'l reinu astur. La lluz de les investigaciones entama a descubrilu.