Los adolescentes asturianos fumen menos pero entamen primero col alcohol

La directora xeneral de Salú Pública del Principáu d'Asturies, Amelia González, presentó ayeri xunto al profesor de Psicoloxía de la Universidá d'Uviéu, José Ramón Fernández, el 'Informe sobre'l consumu de drogues y los factores de riesgu y protección en población xuvenil de 12 a 18 años d'Asturies'. Del estudiu sácase la conclusión de que los adolescentes asturianos reducen el consumu de tabacu pero entamen más pronto nel d'alcohol.
Asina, Amelia González destacó en rueda prensa que'l consumu de drogues llegales y illegales "s'estabiliza o ta reduciéndose" pero nun debe "baxase la guardia" polo que se va continuar desarrollando campañes y programes de prevención.

Según González, el consumu de drogues ye un tema que preocupa y ye prioritariu pa la Conseyería porque afecta a la salú, a les relaciones sociales y a los recursos sanitarios.
En concreto, dende l'añu 2.000 hasta l'actual, el consumu de tabacu diariu foi un descensu dende un 26,6 por cientu al 11,8 por cientu; y el consumu nel últimu mes baxó progresivamente del 36,1 por cientu al 29,5 por cientu. Nesti sen, tanto la diretora xeneral como l'artífice del estudiu apuntaron la posible relación ente les campañes y programes de prevención y el descensu rexistráu.
Sin embargu, dambos comentaron qu'anque'l consumu d'alcohol ta estabilizándose, los adolescentes asturianos tomen alcohol cada vez a una edá más temprana, ya qu'ente los 12 y 13 años ya se rexistra consumu d'esta sustancia. El patrón de consumu ta centráu nel tiempu d'ociu del fin de selmana. Amás, l'informe apunta a que'l 27,8 por cientu de la muestra ente 14 y 18 años ye consumidor de riesgu, con especial incidencia nos 16 años.
L'informe apunta a que'l consumu ye asemeyáu nel añu 2000 y el 2007, al rexistrar un 61,5% y un 69,9% nos últimos 30 díes respectivamente; 78,9% y 78,2% nos últimos 12 meses; y el 79,3% y 82,4% a lo llargo de la vida.

De la mesma manera, indica un descensu del consumu en relación col añu 2004, onde rexistróse un 77,5% nel últimu mes; 87,1% nel últimu añu; y 89,5% na vida.
Pal estudiu --desarrolláu al traviés d'un conveniu ente la Cosneyería de Salú y la Universidá d'Uviéu-- encuestóse a 2.992 mozos d'ente 12 y 18 años, anque pa les comparatives emplegáronse lo datos de magar los 14 años, pa facelos coincidentes colos estudios nacionales, los cuales treslladábense a Asturies.
La edá media de los encuestaos ye de 15,09 años, y el cinco por cientu yeren inmigrantes. De la mesma manera, el 47,3 por cientu fueron muyeres y el 52,7 por cientu homes. Otru parámetru analizáu ye la convivencia familiar, de tal manera que'l 88,2 por cientu de los adolescentes viven con dambos pas, y un 64,7 por cientu tien hermanos.

Amás d'alcohol y tabacu, l'ampliu estudiu analiza tamién el consumu de drogues illegales como cannabis, cocaína y éstasis, dalgo que tamién preocupa a la Conseyería.
Asina, el cannabis caltién un consumu estable, nunos parámetros próximos al 35 por cientu nel consumu esporádicu; del 30 por cientu nel últimu añu; y del 20 por cientu nel últimu mes.
El consumu de cocaína rexistra un descensu dende'l 2004 --al pasar del 9% al 6,5% dalguna vez, del 7,7% al 5,3% nel últimu añu y del 3,8% al 2,9% nel últimu mes-- pero la tendencia supera a les cifres contabilizaes nel añu 2000, cuando'l consumu esporádicu yera del 4%, el 2% nel últimu añu, y del 0,6% nel últimu mes.

L'informe destaca la importancia de desarrollar programes dirixíos a incrementar la perceición del peligru p'avanzar na prevención del consumu de drogues.
Nel estudiu fueron encuestaos amás profesores (219) y la totalidá de los técnicos municipales de prevención. Asina, mientres que los docentes nun consideren que'l consumu afecte espcialmente al ambiente de los centros y la marcha de l'actividá educativa nin tengan munches espectatives puestes na eficacia de los programes de prevención, los técnicos consideren que'l consumu de drogues xenera problemes nes sos poblaciones y se muestren más optimistes en cuantes a la eficacia de los programes.