Los actos académicos y los congresos van centrar el cuartu centenariu de la Universidá

Los actos académicos solemnes y los congresos universitarios de carácter nacional son los principales eventos incluyíos na previsión de les celebraciones del cuartu centenariu de la Universidá d'Uviéu, que se van desarrollar a lo llargo del cursu qu'acaba d'entamar.

El rector de la Universidá, Juan Vázquez, dio ayeri en rueda de prensa, un avance de les previsiones coles que cuenta la institución académica de cara a la celebración de la efeméride. Sicasí, dexó claro qu'a lo llargo del cursu van dir faciéndose añadíos al programa d'actividaes, pal que prevé un presupuestu inicial de 300.000 euros, la mitá d'ellos apurríos por Caxastur.

Los actos académicos son los más llamativos de los incluyíos hasta'l momentu nel avance presentáu. A lo llargo del presente cursu van investise dellos doctores honoris causa de la institución, provenientes toos ellos de los ámbitos culturales y científicos.

Tamién va facese entrega de les medalles del IV Centenariu y de les distinciones de la Universidá. Sicasí, el rector nun adelantó los nomes de los posibles aspirantes a tales condecoraciones.

La Universidá d'Uviéu va ser también sede esti añu de dellos congresos y conceyos universitarios de calter nacional y internacioncal. Ye'l casu del Conseyu d'Universidaes, el conceyu del G9 d'Universidaes, el Comité Universitariu de Relaciones Internacionales, l'Asamblea Plenaria de Decanos de Derechu d'España y el Conceyu Internacional de Facultaes de Xeografía y Historia. También se van facer dellos congresos científicos y un coloquiu sobre inmigración, programáu del 18 al 20 d'ochobre.

Toos ellos constituyen dalgunes de les decenes d'actividaes que la institución prevé desarrollar esti cursu, y que'l Rectoráu agrupó en llinies temátiques. Una d'elles va ser la de los ciclos de conferencies científiques, lliteraries, sobre'l propiu centenariu y d'otra frasca. Tamién van editase documentos como una nueva Historia de la Universidá d'Uviéu -la última sólo recueye la so trayectoria hasta la época de Fermín Canella-, dalgunos documentos singulares que van reeditase o publicación de materiales institucionales, asina como documentos audiovisuales y electrónicos.
Esposiciones artístiques o sobre la historia de la Universidá, premios culturales y competiciones deportives, conciertos de música clásica, coral o de rock y fiestes universitaries tamibén s'incluyen dientro del cartelu.
Otra efeméride a celebara va ser el vixésimu aniversariu del Programa Erasmus, que va incluyir una serie d'actividaes especiales, en collaboración col Ministeriu d'Educación. El programa América, que va establecer contactos con universidaes d'América Llatina, o los Díes de les Universidaes, dedicaos a otres universidaes españoles, van ser otres iniciatives dientro d'esta llinia.