Lombardía va recibir n'An Oriant la medaya que lu reconoz como Chevalier des Arts et des Lettres

El salón d’honor de l'Hôtel de Ville d’An Oriant va acoyer esti vienres l’actu d’entrega a Lisardo Lombardía, de mano del ministru francés d’Europa y Asuntos Esteriores, de la medaya que lu reconoz como Chevalier des Arts et des Lettres. Cultura concede esta condecoración de la Orde de les Artes, una de les cuatro mayores de la República.

El llavianés, xubiláu recién depués de 14 años como direutor del Festival Interceltique de Lorient, recibe esta nominación a la Ordre des Arts et des Lettres de la République Française nel grau de caballeru, y conviértese nel primer asturianu n’algamar esti privilexu col que tamién cuenta Luz Casal, gallega con un importante venceyu con Asturies, nel so casu nel grau d’officier. Pedro Almodóvar, Jorge Semprún o la galerista Juana de Aizpuru son otres personalidaes del Estáu que tamién recibieron esti honor.

Esti reconocimientu tien como oxetivu “recompensar a les persones que se distinguieren poles sos creaciones nel campu artísticu o lliterariu o pola contribución al esporpolle de les Artes y les Lletres en Francia y nel mundu”, espliquen dende'l Ministeriu de Cultura. Amás del grau de caballeru y d'oficial tamién ta’l de commandeur (comandante), el superior de la Orde de les Artes y les Lletres, una de les cuatro mayores condecoraciones de la República xunto cola Lexón d'Honor, la Orde Nacional del Méritu y les Palmes Académiques.

Jean-Yves Le Drian, ex alcalde d’An Oriant y ex presidente de Breizh, y actual ministru d’Europa y Asuntos Esteriores, va encargase de poner la medalla Lombardía nel ayuntamientu de la población bretona mañana a les 17 hores. D'esta miente reconozse'l llabor del tamién presidente de la Fundación Belenos “al rodiu l’interceltismu internacional y la cultura bretona, acordies cola so xera de toa una vida enfotáu na construcción d'una cultura asturiana, en diálogu col mundu dende la so propia conciencia de ser”, rescamplen dende esta entidá.