Lombardía recibió una sorpresa del Festival Interceltique de Lorient cola interpretación de ‘Nel Pozu María Luisa’

Doce bagadoù tocaron xuntes el sábadu nel Festival Interceltique de Lorient ‘Nel Pozu María Luisa’ en reconocimientu a Lisardo Lombardía, direutor del certame que dexa’l cargu esti añu depués de 14 con motivu de la so xubilación. Asturies tamién tuvo presente na Gran Parade Bretagne del domingu.

La celebración del Carte Blanche Sonerion nel Stade du Moustoir el sábadu, en sustitución al concursu de bagadoù, incluyó un actu de reconocimientu a Lombardía. El responsable del Inteceltique dende’l 2007 pudo sentir de primer mano’l ciñu de los bretones, que prepararon la interpretación d’un tema de fondu raigañu asturianu.

Asina, llueu de recibir unes pallabres, pudo ver dende l’escenariu como una docena de bagadoù tocaben dende la grada ‘Nel Pozu María Luisa’. “A Lisardo prestó-y enforma”, confesó Iñaki Santianes, responsable de la delegación asturiana n’An Oriant que la mañana siguiente llevó la bandera d’Asturies na Gran Parade Bretagne, eventu que sustituyó a la Gran Parade des Nations Celtes.

7.000 persones axuntáronse nel campu del Lorient pa presenciar el desfile de bandes y agrupaciones bretones. “Toles actividaes tán teniendo una bona acoyida. Les del Espace Marine tán algamando ente un 80 y un 90 por cientu d’asistencia”, apunta Santianes, que cifra en 2.000 les entraes vendíes pal conciertu d’esta nueche de la Orchestre National de Bretagne que va contar con protagonismu asturianu.

Ramón Prada compunxo ‘Tierra’, ún de los cinco movimientos que se van interpretar nel espectáculu entituláu ‘Finisterres celtiques’, nel que la orquesta va contar col acompañamientu de Xosé Antón Fernández ‘Ambás’, Ramsés Ilesies y José Ángel Hevia. Frédérique Lory (Breizh), Paul Leonard Morgan (Alba), Sir Karl Jenkins (Cymru) y Bill Whelan (Éire) son los responsables de los otros cuatro pa una de les cites centrales de la cincuentena edición del Interceltique.

Na semeya, les banderes de les naciones celtes presentes nel Interceltique nel marcu de la Gran Parade Bretagne.