Llope y de la Cera espunxeron los sos estremaos puntos de vista sobre izquierda y derechos llingüísticos n’Asturies

El seminariu "Llingua, Clase y Sociedá" tuvo na segunda mesa que se celebró ayeri baxo'l títulu "izquierda y derechos llingüísticos" un cruce d'opiniones opuestes nes llectures que ficieron Manuel Fernández de la Cera, ex-conseyeru nel gobiernu de Pedro de Silva y el portavoz d'Izquierda Asturiana Inaciu Llope.

De la Cera, que fizo toles sos intervenciones n'asturianu occidental fizo una llectura en positivo na que sorrayó "aciertos" como "la creación de premios lliterarios y los avances na toponimia asina como nel folklore", y emponderó'l fechu que "güei escríbese muncho meyor que nos tiempos de Conceyu Bable". De la Cera fizo alcordanza de la so etapa al frente de la conseyería de Cultura, un tiempu "en que mandábemos cartes a los padres pa que matricularen a los sos fíos en clase d'asturianu" y dixo que "la especialidá de Filoloxía Asturiana ye fundamental" pal futuru del idioma.

El segundu ponente de la sesión, Inaciu Llope, preguntóse si yera necesario de "falar d'izquierda y derechos llingüísticos, en cuantes que se supón que "la izquierda tien de reconocer tolos derechos, incluyios los llingüísticos" pa concluyir que "Desgraciadamente hai que falar d'ello porque una parte de la izquierda asumió'l discursu burgués sobre les minoríes". Yendo al títulu de les xornaes, Llope recordó que "l'asturianu siempre foi un marcador de clase, por cuanto'l so usu yera mayoritariu nes clases populares" y declaró que "El pecáu orixinal de la izquierda española foi interpretar lo identitario como un problema" y que n'Asturies esa izquierda "considera'l fechu de que se fale asturianu como una desgracia" polo que pal ponente "esa izquierda busca la desapaición del asturianu con un mínimu coste políticu".

La segunda intervención de Fernandez de la Cera centróse nel fechu de que la burguesía asturiana nes villes "falaba asturianu pero tenia mala conciencia por ello". L'ex - conseyeru recordó la llei del asturianu que quixo impulsar el gobiernu de Pedro de Silva y dixo que daquella "el sector retrógadu del PSOE y la mesma ALLA" refugáronla por razones distintes. De la Cera evitó pronunciase sobre la oficialidá y sobre la posición del PSOE al respeutive, señalando namás que que "si la demanda d'asturianu qu'hai en primaria la hubiere en secundaria y bachiller ya habría oficialidá".

Inaciu Llope fizo una llectura final mui dura de valoración na qu'aseguró que "nun hebo una sola midida tomada nestos 30 años que garantice'l futuru del asturianu" añadiendo que la FSA "miente cuando venceya oficialidá y obligatoriedá" y qu'esta ye "una midida indispensable anque non suficiente pal futuru del idioma".