El 91 por cientu de los llectores d’Asturies.com ve bien la suspensión de les clases de toréu pa neños

El Conceyu de Xixón suspendió unes clases de toréu pa neños previstes na playa de San Llorienzu pal pasáu 12 d’agostu. Esti tipu d’actividaes cuenta col refugu del 91 por cientu de los usuarios d’Asturies.com que participaron nel nuesu ‘Conceyu Abiertu’.

Hasta 11.000 persones votaron en Change.org –la cifra agora supera los 12.000– nuna propuesta que solicitaba al Ayuntamientu la so prohibición, anque la verdadera razón pola que’l gobiernu dio’l pasu foi’l llugar escoyíu pa la so celebración: la playa de San Llorienzu. Según reza la normativa municipal, nun se permiten la celebración d’actividaes na sablera principal xixonesa mientres los meses de branu que pudieren molestar a los usuarios, lo que dexa la puerta abierta al entamu de clases de toréu n’otros puntos de la ciudá, como pues ser la propia plaza de toros d’El Bibio, onde yá tuvieron llugar n’años anteriores.

La posibilidá de que neños y neñes puedan aprender a torear nun espaciu públicu nun ye del agradu del 91 por cientu de los nuesos usuarios, mentes qu’un 9 por cientu considera que deberíen ser los padres los qu’escoyeren nel casu de que se celebrara l’actividá. Nengún llector votó pola opción ‘Nun sé’.

Dende esti momentu, yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usuarios, tres la celebración d’un alcuentru’l pasáu sábadu na Tierra de Miranda de coleutivos de promoción del idioma común, sobre’l contautu esistente ente les comunidaes de falantes del dominiu asturlleonés.