Llangréu presenta una campaña pa la normalización nel comerciu

D'otra manera, l'ayuntamientu va dar un mes de plazu pa estudiar l'espediente de la Xunta de toponimia coles asociaciones representatives del conceyu y cola Academia de la Llingua enantes de llevar el tema a plenu

La casa la Cultura de Sama asitiada nes Escueles Dorado de Sama foi l'escenariu au se presentó ayeri la campaña pal comerciu "Pídilo n'asturianu, failo n'asturianu", una iniciativa consistente n'afalar l'espardimientu del asturianu al traviés del comerciu qu'entama l'Área de Política Llingüística del Ayuntamientu de Llangréu col sofitu de la Conseyería de Cultura al traviés de la Oficina de Política Llingüística Ramón d'Andrés y l'asesoramientu de l'Academia de la Llingua Asturiana. ACOIVAN y ACOSA, les dos asociaciones de comerciantes del conceyu llangreanu van collaborar con esta campaña, que persigue dos oxetivos, ún ecónómicu de promoción el pequeñu y medianu comerciu local y otru cultural de normalización del asturianu.

La campaña va centrase en carniceríes, pescaderíes, fruteríes y puestos de pan y lleche y va consistir nun cartel xeneral cola conseña: Pídilo n'asturianu, failo n'asturianu. Xunta ello va haber 4 trípticos específicos pa los productos, y amás, tres cartelinos tamañu DIN A5, colos conteníos "Los nuestros productos son de la meyor calidá" "Espere pol so turnu, por favor" y "Munches gracies por visitanos".

Luis González Bada, conceyal delegáu del Área de Política Llingüística del Ayuntamientu, Yolanda Magdalena Montes, responsable d'Área, Ramón d'Andrés, xefe de la Oficina de Política Llingüística del Principáu y Pablo Manzano, representando a l'Academia de la Llingua Asturiana, acudieron a esti actu de presentación xunta con responsables de política llingüística d'otros conceyos y de les asociaciones de comerciantes.

D'otra manera, según pudo saber Asturies.com, l'informe toponímicu ellaboráu pola Xunta de Toponimia sobre los nomes de llugar del conceyu va precisar d'un mes d'espera enantes de saber si tien el preste del Ayuntamientu o non. Anque l'aprobación del espediente llegó a enxertase nel orde del día del últimu plenu, el conceyu decidió dar un mes de plazu enantes de sometere la cuestión a votación, atendiendo asina la petición que formulare Izquierda Xunida - Bloque por Asturies na Comisión de Cultura la selmana pasada por nun tar conforme la coalición cola recomendación de la forma "Llangreo" como única denominación pal conceyu en cuenta de "Llangréu". la coalición llamaba a consultar coles entidaes representatives del conceyu y cola Academia de la Llingua enantes d'aceptar l'informe de la XAPTA