Llangréu celebra esti fin de selmana'l certamen cultural "tolo d'Asturies"

Los próximos díes 18, 19 y 20 de mayu, Llangréu va acoyer la muestra cultural "Tolo d'Asturies", que va allugase nel recintu de la estación d'autobuses de Llangréu. "Tolo d'Asturies" ye una feria que naz cola intención d'amosar diferentes realidaes representatives de la gran bayura cultural d'Asturies. L'Ayuntamientu de Llangréu y la Conseyería de Cultura, Comunicación Social y Turismu del Principáu d'Asturies patrocinen esta feria qu'organicen les asociaciones culturales "Reija" y "L'Enguedeyu", dos grupos con gran tradición y de reconocíu prestixu que siempre busquen el caltenimientu y espardimientu del folclor y la etnografía popular en tolos sos aspectos, amás de cuntar con escueles de música y cultura tradicional.

"Tolo d'Asturies" incluye nes sos actividaes música, baille tradicional, muestres didáctiques, gastronomía, artesanía o animación de cai. Les actuaciones de Tuenda, Xuacu Amieva, Anabel Santiago, Tejedor, Banda Gaites de Llangréu, Xentiquina, Los Llanzones y Hector Braga o los artistes de canción asturiana Che de Cabaños, Marisa Valle Roso o Fernando Valle Roso

La feria echa a andar el vienres 18 de mayu a les 22:00 hores con un gran conciertu a cargu de Xuacu Amieva y Tuenda, mientres qu'al día siguiente, 19 mayu, a les 12:00 hores tendrá llugar la inauguración oficial de la feria cola apertura de los puestos de venta de productos de la tierra y artesanía asturiano.

El sábadu y el domingu, la bandina Los Llanzones va animar la feria cola so música, el baille y les sos histories, tratando de conectar col públicu algamando la so complicidá y la so participación, tratando de xuntase cola xenta nun espectáculu interactivu enllenu de folixa y bon humor. A les 18:00 hores del sábadu, el coru de guah.es del la escuela pública Solvay de Lieres "Xentiquina" va actuar baxo la dirección del so creador Nacho Fonseca pa lo pequeño de la casa. Pa esa mesma tarde del sábadu van facese les amueses didáctiques d'indumentaria y instrumentos tradicionales de la nuestra cultura, pesllando la xornada un gran conciertu a cargu d'Anabel Santiago Y Tejedor.

El domingu sigue la feria con talleres artesanos, muestres gastronómiques, animación de cai cola bandina Los Llanzones, grupos de baille y pareyes de gaita y tambor. A les 13:00 hores la Banda Gaites de Llangréu animará a tola xente desfilando del Parque Vieyu La Felguera pal recintu ferial, rematando la mañana la tonada del Che de Cabaños, Marisa Valle Roso o Fernando Valle Roso. Yá de tarde, a les 18:00 hores Carlos Alba "Cellero" pondrá una sesión de cuentacuentos que va echar el piesllu definitivu al alcuentru.