Llangres repite como grupu del INJUVE

El "Instituto de la Juventud" (INJUVE) entama tolos años un
circuitu de conciertos nel qu'actuen grupos o solistes mozos seleccionaos pol
institutu. Ente los estilos musicales tan la música clásica, jazz,
canción d'autor, otres músiques y el folk, apartáu pal que na
edición d'anguaño l'INJUVE seleccionó al grupu asturianu
Llangres.



El circuitu del
INJUVE
tien como oxetivu la realización d'una riestra de conciertos en locales
privaos y públicos, que programen música davezu, y ponen a
disposición del músicu mozu les mesmes infraestructures y
condiciones técniques de les que gocen los sos compañeros
profesionales, ya qu'estos conciertos quieren afalar la
profesionalización de los músicos y ufiertar interpretaciones
nueves a un públicu lo más ampliu posible.Cada añu son
cientos les candidatures que se presenten pa participar nestos conciertos, y
n'ediciones anteriores fueron seleccionaos
otros grupos asturianos como Xera, Anabel Santiago o DRD. Anguaño
salió
escoyíu un únicu grupu asturianu,
Llangres.



Rescampla la selección de la banda de folk asturiana ya que repiten
presencia nel circuitu del INJUVE, nel que yá participaron en 2002.
Naquel añu'l grupu taba acabante de sacar el so primer discu Stura,
circunstancia que se repite, ya que nun va munchu tiempu que Llangres
espublizó'l so segundu discu, Esnalar, amás de contar cola
incorporación de la cantante Esther Fonseca. Nel apartáu de folk
tamién foron seleccionaos los grupos Free Folk (Castiella y
Lleón) y Xazzar (Catalunya). Inda nun se saben les feches de los
conciertos que va dar Llangres per toa España, anque'l grupu avisa que
va dar anuncia d'ellos al traviés de
la so páxina web.