“Llangreo” pasa la primer peñera

La Comisión de Cultura del Conceyu de Llangréu dio de pasu la propuesta que-y presentare la Xunta de Toponimia colos votos al favor de PP y PSOE. IX-Bloque abstúvose por culpa de la presencia nel informe de la propuesta de la forma "Llangreo" como topónimu tradicional en cuenta de "Llangréu"

La propuesta de la Xunta de Toponimia del Principáu que recueye la forma "Llangreo" como única denominación posible pal conceyu de la cuenca minera pasó esta mañana la primer preba na Comisión de Cultura del Conceyu colos votos favorables de PSOE y PP. Izquierda Xunida decidió abstenese argumentando que enantes de camudar la forma "Llangréu" pola que se venía apostando dende va más de venti años pola forma "Llangreo", sedría preciso facer primero consultes cola Academia de la Llingua Asturiana y tamién con toles asociaciones de vecinos y culturales representatives del conceyu. L'apueste de IX-BA ye claramente por caltener la forma Llangréu y asina'l portavoz municipal de la coalición Xandru López declaró que "Llangréu" ye "la denominación socialmente aceptada y la que defende l'Academia de la Llingua Asturiana" mientres qu'el conceyal de cultura Luis Bada (PSOE) defendió la opción que presentare la Xunta de Toponimia, que tuvo l'apoyu unánime de PSOE y PP

La propuesta de la Xunta de Toponimia, qu'afecta a más de 250 topónimos mayores y menores y que na mayoría de los casos contempla esclusivamente l'usu de la forma tradicional asturiana en cuenta del doble usu castellanu / asturianu, salió alantre na Comisión colos cinco votos favorables de PP Y PSOE y les dos abstenciones de los representantes de IX-BA, y agora va pasar al plenu del Conceyu de Llangréu, siguiente pasu nun procesu burocráticu que tien la parada final nel Conseyu de Gobiernu d'Asturies.