Llamazares nun va repetir como voceru d’IX nel Congresu

El diputáu d’Izquierda Xunida (IX) por Asturies, Gaspar Llamazares, nun va repetir como voceru de la so formación nel Congresu. El secretariu xeneral de la coalición y candidatu pola Comunidad de Madrid, Cayo Lara, va ocupar esi puestu.
 
El númberu dos del grupu parllamentariu será’l cabeza de llista por Sevilla y secretariu xeneral del PCE, José Luis Centella, mentes que la tercer portavocía correspondería-y al primer diputáu d’ICV, Joan Coscubiela. Lara reservara a Llamazares la cuarta portavocía, pero ésti refugó’l cargu al considerar qu’esti voceru nun tien papel nengún nel Congresu.
 
Tres presidir la Comisión de Sanidá na llexislatura pasada, el políticu nacíu en Logroño repitirá nel cargu nel casu de que’l PP, con mayoría absoluta, acepté’l pidimientu d’IX d’encabezar otra vegada esa comisión. Depués del aconceyamientu del so grupu parllamentariu, Llamazares asistió a la reunión última de la Diputación Permanente de la IX Llexislatura, cita qu’aprovechó pa despidise como voceru de la so organización y anunciar que, a partir d’agora, va ser voceru "de los ciudadanos", pero non d’IX.
 
Na so cuenta de Twitter, l’ex secretariu xeneral de la coalición quixo dexar clara la so posición y autoproclamase "voceru de los ciudadanos y de los asturianos rebeldes y d’izquierdes". "Me basta y me sobra. Gracies pola confianza", escribió aceptando "con naturalidá" el "derechu de la mayoría a los sos voceros afines", pero alvirtiendo qu’esa actitú, anque "lexítima", ye un error. "Paezme un error que yo tamién cometí, pero ye un error. Hai presidente voceru, voceru axuntu y inclusive voceru rotatoriu, y los desempeñé. El voceru 4 o 5 nun esiste en Cortes. Diputáu sí", insistió Llamazares enantes d’afirmar que nun ta "enfadáu nin frustráu", sinón "agradecíu a los ciudadanos y a IX".

Comparte...                                    

Enllaz permanente