L’IRA dexa les armes

L'Exércitu Republicanu d'Irlanda anunció esta mañana l'abandonu de les armes y diz que va perseguir los sos oxetivos esclusivamente pela vía pacífica. L'anuncia féxose esta mañana nun comunicáu nel que pon la fin de la llucha armada pa les 4 d'esta tarde y diz que tien dao orde a toles sos unidaes de deponer les armes y ayudar al desenrollu de programes esclusivamente políticos y al traviés de víes pacífiques. L'IRA anunciaba tamién la presencia de miembros de les ilesies católica y protestante pa que sían testigos del dearme, anque nun fala de destrucción de los sos arsenales. Ensin pidir escusa nenguna poles víctimes de los sos 30 últimos años de la so actividá , el comunicáu ataca a los gobiernos de Londres y de Dublín xunto colos partíos unionistes d'Irlanda del Norte por nun comprometese a fondu col procesu de paz.

Darréu de l'anuncia del IRA, Gerry Adams, líder del Sinn Feinn, la organización política venceyada a la organización armada, dixo qu'agora'l Gobiernu británicu yá nun tien escusa pa siguir ocupando Irlanda del Norte. Adams, que yá fexere va dellos meses un llamáu al IRA pa que dexare les armes, calificó de "valiente" la postura del IRA y pidió que se cumplan los alcuerdos del Vienres Santu y pidió-y al gobiernu Irlandés que faiga la parte que-y toca nel llabor pola unidá d'Irlanda, pidiéndo-yos a los dos bandos, republicanos y unionistes a que deprendan a convivir en paz, espresando la so solidaridá coles families de toles víctimes d'estos 30 años d'enfrentamientu cola frase "el meyor homenaxe que-yos podemos facer ye algamar la paz"

El Partíu Unionista del reverendu Ian Paisley, partidariu de la pertenencia d'Irlanda del Norte al Reinu Uníu, reaccionó con escepticismu y pidió-y al IRA qu'entregue toles armes, mientres que'l primer ministru británicu Tony Blair calificó l'anuncia como de "gran importancia" declarando qu'agora "hai que ver que se cumpla".

Más información: Sinn FeinnPartíu UnionistaAlcuerdos del Vienres Santu BBC Irish Times Guardian Independent The Times