L'Institutu Nacional de Metereoloxía promete un parte del tiempu más precisu

L'Institutu Nacional de Meteoroloxía (INM) presentó ayeri en Santander un sistema nuevu de prevención y vixilancia de fenómenos atmosféricos que va dar serviciu p'Asturies y Cantabria

El sistema, col nome xenéricu de "Meteoalerta" ta pensáu especialmente p'alvertir de situaciones puntuales de riesgu por fenómenos atmosféricos de toa triba, dende bastiazos que puen facer argayos hasta ñeve pasando per ñubes de polvu o polen en suspensión, alvirtiendo de too ello nun plazu de 60 hores. El sistema va alvertir de foles de calor con muncha más precisión que'l que funcionaba hasta agora, evitándose situaciones como la que se dio va pocos díes al alvertir la Dirección Xeneral de Protección Civil y Emerxencies, con sede en Madrid, d'una fola de calor que nun asocedió. No tocante a Asturies, el sistema estrema'l territoriu en cinco zones distintes, quev son costa oriental, costa occidental, centru, suroccidente y cordelera cantábrica, apurriendo pronósticos pa cauna d'elles