L'Ibex rexistra los másimos del añu

Les xubes xeneralizaes nos mercaos europeos ficieron posible que´l selectivu Ibex-35 se mangase penriba los 7.300 puntos en dalgún intre de la sesión del vienres. Sólo les males anuncies de Wall Street encurtiaron la xuba del Ibex, qu'al final trancó raspiando los 7.300 nun clima d'euforia nel que se dio anuncia de que les compañíes del Ibex-35 multiplicaren por 8,7 les sos ganancies.

La selmana tuvo condicionada poles estadístiques macroeconómiques d´Estaos Xuníos. Xuba del 0,8% de los precios de producción d´ochobre cuando se contaba col 0,3%. Descensu del 0,3% nes ventes minoristes, un datu de capacidá d´utilización n´ochobre del 75%, dientro les previsiones. L'índiz de confianza de la Universidá de Michigan foi de 93,5 puntos, meyor de lo que se contaba. Hasta equí too bien, pero l´anuncia que frenó les bolses foi'l permalu resultáu de la producción industrial nos Estaos Xuníos, que medró un probetayu 0,2% cuando los economistes esperaben un 0,4%.

Wall Street trancó'l vienres con duldes sobre les posibilidaes reales de recuperanza económica de los Estaos Xuníos. L´índiz Dow Jones terminó nos 9.768,68 puntos con una baxada'l vienres del 0,7. L´índiz tecnolóxicu Nasdaq peslló tamién en negativo al algamar perdes del 1,9.

Al otru lláu del Atlánticu la selmana foi muncho meyor, en parte gracies a les estadístiques positives que dan anuncia d´una recuperanza económica sólida nel prósimu añu. Asina'l xorrecimientu del PIB del tercer trimestre de la Xunión Europea foi del 0,4%. El casu foi que delles de les principales bolses d´Europa algamaron másimos anuales, casu de Francfort y Llondres, y les demás raspiaron másimos del añu, casu de Madrid o París. En xeneral, les xubes de los parqués europeos tuvieron penriba´l 1%.

N'España l'oxetivu yera poner l'Ibex nos 7.300 puntos, y anque nun se cumplió por poco la realidá ye que parez que la Bolsa de Madrid va tener un pieslle d'añu a lo grande. L ´Ibex asitiose en 7.293,8 puntos con una xuba nel conxuntu de la selmana del 0,35%. El volume de negociu aumentó hasta llegar a los 1.669 millones d´euros el vienres. Ente los valores con mayores xubes tuvo Iberia, que según los espertos ye l´aerollínia más rentable nel continente. Altadis, Arcelor y Sogecable tamién destacaron nel terrén positivu. El sector bancariu y la petrolera Repsol YPF tuvieron una selmana positiva pero con probetayes xubes. Bona selmana tamién pal Grupu Telefónica.

El petróleu xubió la selmana pasada ensin aparar hasta algamar los 29,7 dólares barril. Les probetayes reserves d´Estaos Xuníos tien bien preocupaos a dellos analistes, que ven nello la escusa pa caltener un preciu altu pal oru prieto. Na mesma llínea la cotización del oru (mariello) tamién xorreció hasta los 395 dólares onza, lo que supón una de les mayores xubes de los últimos meses. L´euru sigue llevándolo de cai y cotízase ya a 1,175 dólares, lo que supón la mayor xuba del mes y una amenaza pa les esportaciones europees.