L'habanera de Rodrigo Cuevas ‘Rambalín’ yá tien videoclip

La Conseyería de Cultura, Política Llingüística y Turismu estrenó esti xueves el videoclip de ‘Rambalín’, tema ganador del XII Premiu Camaretá al Meyor Cantar, grabación que forma parte de la recompensa pol gallardón. La pieza, con imáxenes de Xixón y vecinos de Cimavilla, diríxela Marta Lallana y produzla El Cohete Internacional.

El tratamientu del videoclip, promovíu al traviés de la Sociedá Pública de Xestión y Promoción Turística y Cultural del Principáu d’Asturies, ta cercanu al documental, con personaxes reales que viven nel barriu altu y con escenes “averaes a la so realidá qu’evoca l’alcordanza común que tresmite’l tema”, apunten dende la conseyería. Lallana señala que la so intención foi crear una pieza “qu’en cuenta de sobresplicar lo que yá cunta la lletra, apurriere una dimensión ente la realidá y la poética, recurriendo a l’alcordanza de l’ausencia de Rambal y a la so tan inspiradora llibertá”.

Amás “quería xugar cola idea de que’l cantar fore como una especie d’himnu qu’habita nos vecinos de Cimavilla, retratando la so ausencia al traviés d’alcontralu presente nos sitios que percorría”. Cuevas nun apaez nel videoclip, que fina con un testu del cantante que diz “a toles persones que, cuando tas avezáu a vivir ente’l despreciu y la vergoña, te miren con tresparencia, t’acompañen con respetu, y te faen decatate de que la vida puede ser maraviyosa. A los playos y playes qu’asina lo ficieron. Gracies”.

‘Rambalín’ foi’l cantar ganador del XII Premiu Camaretá al Meyor Cantar na gala celebrada’l 13 de payares nel Fantasio de Navia, correspondiente al periodu que va del 2019 a los seis primeros meses del 2020. Nél Cuevas, a ritmu d’habanera, recupera la memoria d’Alberto Alonso Blanco ‘Rambal’, habitante de Cimavilla bien conocíu en Xixón nes décades últimes del Franquismu qu’amosó la so homosexualidá de forma abierta y que foi víctima d’un asesinatu que quedó impune.

Calca equí pa ver el videoclip.