Les primeres valoraciones dende l'ámbitu asturianista na nueche electoral

Asturies.com faló esta nueche electoral con dellos testigos d'estes elecciones. L'académica de la llingua Marta Mori, José Manuel Pérez, de Xuristes pol Asturianu, Fernando Ornosa, del Conceyu Abiertu pola Oficialidá y l'abogáu Amable Concha, fexeron unes primeres valoraciones según diben conocíendose los resultaos.

Pa la escritora Marta Mori, la nota más importante d'estes elecciones foi "la poca visibilidá del votu asturianista", xunto col "clima d'apatía social" en que se vivieron les votaciones, con una "campaña aburrida y unos programes probetayos, que s'espeyaron na baxa participación". Pa la filóloga ye evidente que "la xente nun ta a disgustu con Areces por muncho que se diga lo contrario". De cualquier manera, les votaciones espeyen pa Marta Mori la preferencia de la sociedá asturiana polos gobiernos de coalición y pola presencia de partíos bisagra como ye'l casu d'IX-BA-LV, anque nesta ocasión pudo haber un escesu de confianza que llevó a un tresvase de votu a favor del PSOE.

L'abogáu Amable Concha sorrayó la perda de votu d'IX como una de les notes destacaes de les votaciones. Pal espertu en derechu consuetudinariu asturianu con ello "demuéstrase que siempre que se gobierna en coalición la parte mayoritaria sal reforzada". La inercia marcó p'Amable Concha estes elecciones, en cuantes que s'afita la "tendencia a concentrar el votu nes opciones mayoritaries mientres les alternatives minoritaries tienen dificultaes clares pa que la xente les perciba" dalgo que s'esplica en gran midida porque "la sociedá asturiana ye continuista y vota cola cartera".

Pa José Manuel Pérez, profesor universitariu de derechu y miembru de la organización "Xuristes pol asturianu" la protagonista de les elecciones foi l'abstención, que demuestra que "algo falla" na vida política asturiana. Lo mesmo qu'Amable Concha, Perez tien claro que siempre qu'hai un gobiernu de coalición, una de les partes sal favorecida" anque nel resultáu d'IX nesta ocasión conozse qu'influyó la crisis interna del PCA". Con too y con ello, "el continuismu y l'inmovilismu del mapa políticu asturianu son les notes dominantes. Les posiciones tán afitaes" sorrayando igualmente "lo tristayo d'una campaña que tuvo protagonizada por cuestiones ayenes a Asturies".



Fernando Ornosa sorrayó lo "continuista" del panorama políticu que sal d'estes elecciones y la "reflexón" que tienen que facer toles fuerces polítiques del arcu asturianista, incapaces de llograr resultaos bultables. Centrando la so valoración na cuestión Llingüística que va tener que tratase nesta llexislatura cola reforma del estatutu, Ornosa foi optimista en cuantes que "el PSOE tien que ver que les fuerces qu'apuesten pol asturianu esplícitamente o que, a lo menos, defenden un consensu llingüísticu como ye'l PP, afiten y refuercen les sos posiciones mientres qu'ellos pierden un escañu.