Les Mocedaes Socialistes de Llaviana presentaron una moción en defensa del asturianu

Les Mocedaes Socialistes de Llaviana presentaron una propuesta de moción al Grupu Socialista en Conceyu de Llaviana pa que solicite les subvenciones de la Conseyería de Cultura empobinaes a la promoción del asturianu nos comercios y establecimientos abiertos al públicu del conceyu. La propuesta cola que les Mocedaes Socialistes de Llaviana pretenden que se-y dea "un desarrollu real y efectivu a la Llei d'Usu y Promoción del Asturianu" y que permita a los comerciantes y hosteleros de Llaviana "dende la voluntariedá" poner lletreros o cartelería n'asturianu.

Les Mocedaes Socialistes de Llaviana espliquen que les subvenciones puen apurrir "hasta un 80% del importe" que supondría la ellaboración de los carteles y demás medios pa los conceyos ente 5.001 y 20.000 habitantes, como ye'l casu de Llaviana, polo que conviden al so conceyu a facer les polítiques de normalización "que yá s'apliquen en Samartín del Rei Aurelio o nos conceyos de la Comarca de la Sidra". Los representantes de la organización de xuventú socialista llavianeta aseguren que con midíes como esta "ye posible promover ente toos un desarrollu efectivu, necesariu y real de la Llei d'Usu y Promoción social del Asturianu".