Les imáxenes de vídeu, encontu de la sentencia de trés años contra Cándido y Morala

Los sindicalistes Cándido González Carnero y Juan Manuel Martínez Morala recibieron esta mañana oficialmente la sentencia pol primeru de los dos xuicios a los que s'enfrentaben por acusaciones de destrozos durante les movilizaciones del sector naval nel añu 2005. Como yá s'adelantare esti fin de selmana, la sentencia condena a los dos representantes de la Corriente Sindical d'Izquierda a trés años de cárcele.

El xuez Lino Rubio Mayo, del Xulgáu de lo Penal númberu 1 de Xixón, basó la sentencia que condena a los sindicalistes Cándido González Carnero y Juan Manuel Martínez Moral a 3 años de cárcele na grabación de los fechos por una cámara de videu de la Policía Nacional y poles declaraciones de los axentes qu'intervinieron nel día d'autos. Lino Rubio atiense al artículu 2.66.2 del Códigu Penal pa echá-yos la culpa a Cándido y Morala de "acción voluntaria qu'orixina la inutilización, destrucción o deterioru de coses de pertenencia ayena protexíes pol derechu". El xuez declaró culpables asina a los dos sindicalistes de facer españar un artefactu estrozando una cámara de tráficu, cámara que la sentencia identifica como "bien de dominiu públicu". La sentencia condena a Morala por tapar cola so chaqueta a Cándido mientres esti colocaba l'esplosivu na cámara, que diz que yera probablemente un volador retocáu pa tener más potencia y pa que nun volare. La defensa de Cándido y Morala pidiera'l visionáu nel xuiciu d'estes imáxenes grabes pola policía y que son l'encontu principal de la sentencia condenatoria contra los dos sindicalistes, una posibilidá que'l xuez denegó na vista.

La sentencia ta llevantando un báramu de crítiques dende l'ámbitu políticu. Izquierda Xunida emitió un comunicáu esta mañana en que "con absolutu respetu a la independencia del poder xudicial" diz que la condena ye escesiva y da anuncia d'una "batería d'iniciatives pa evitar presos llaborales nesti país" entamando por una solicitú parlamentaria de "modificación urxente del Códigu Penal pa eliminar la reforma que ficiere nelli'l PP". Pela so parte, Izquierda Asturiana (IAS) diz que la condena ye "indignante" y que tres d'ella escuéndese "un castigu exemplarizante y intimidatoriu pa toos aquellos que lluchen pol so puestu de trabayu. Pa IAS, el Ayuntamientu de Xixón ye corresponsable de la sentencia, y acusa precisamente al responsable d'Izquierda Xunida Jesús Montes "Churruca" de ser "un chaqueteru políticu".