Les grandes industries asturianes van pagar la corriente más barato

El Ministeriu d'Industria, atendiendo a les peticiones del Gobiernu asturianu y del gallegu, va caltener la tarifa eléctrica especial (G-4) en pasando l'añu 2010, según adelanta esti vienres el diariu El Comercio. Esta tarifa, que beneficia a los grandes grupos industriales, supón-yos un gran aforru tolos años a los trés mayores consumidores d'electricidá d'Asturies, les empreses Arcelor, Asturiana de Zinc (Azsa- Xstrata) y la fábrica d'aluminiu Alcoa.

La xuba del recibu de la corriente pa estos trés xigantes industriales va ser del 6,5% mientres que los demás consumidores industriales van arrecostinar con una xuba del 9,5%.

Ente Alcoa, Azsa y Arcelor consumen más del 50% de tola corriente que se factura n'Asturies, suponiendo la factura amestada de les trés compañíes un total de más de 4,7 teravatios. L'aforru que pa estes trés industries supón la tarifa G-4, en vigor dende va 22 años, perítase en cerca de 46,5 millones de euros. Les trés empreses amenazaren delles vegaes con que, de perdese esta tarifa, les sos actividaes n'Asturies diben ver comprometida la so rentabilidá. El caltenimientu de la tarifa G-4 fuere ún de los puntos que más esmolecíen al presidente asturianu, qu'asina-y lo tresmitió al ministru Joan Clos.