Les fuerces asturianistes énte'l 8 septiembre

Los distintos partíos políticos del ámbitu asturianista presenten los sos actos pal Día d'Asturies.

El 8 de septiembre ye una fecha que suel llevantar tolos años bastante polémica ente los partíos asturianistes o nacionalistes. Les distintes invitaciones a participar nos actos que caún organiza faen qu'asistamos a un xuegu de negociaciones y convites qu'esti acabó col resultáu que vien darréu.

Izquierda Xunida-Bloque por Asturies escoyó Xixón pa entamar les sos actividaes nel primer añu d'esta unión de partíos, y depués d'entrar a forma parte del gobiernu asturianu. IU-Bloque convoca una manifestación el Día d'Asturies a les 13:00 que va salir de la plaza L'Humedal de Xixón. Depués de la manifestación tan previstos una serie d'actos nel Campu Valdés, xuegos infantiles, muestra de deporte tradicional, gaita, too ello acompañáu por sidra y una xinta. Pa la tarde ta reservada la música coles actuaciones de Mari Luz Cristobal Caunedo y Anabel Santiago nel apartáu de la tonada a partir de les 19:00 hores. Depués va tar la música folk y el rock, con Acuto, Batulax y Dixebra. Los convocantes d'estos actos, baxo'l lema "Oficialidá y Autogobiernu: Otra Asturies ye posible", amás d'IU-Bloque son CCOO, UXT, USO, Lliberación, El Garapiellu, FAC (Foru Arte Ciudá), Ciudadanos del Mundo y La Deva (Grupu baille).

Pela so parte Izquierda Asturiana (IAS) entama en solitario una xinta que va tener un actu políticu al que van asistir militantes del partíu asina como amigos y simpatizantes d'Izquierda Asturiana. El llugar escoyíu ye Sebares nel conceyu de Piloña, onde la formación asturianista algamó unos bonos resultaos nes últimes elecciones.

Andecha Astur convoca la so tradicional manifestación peles cais d'Uviéu, la marcha va salir a les 13:00 hores de la Estación Norte p'acabar na Plaza de la Escandalera. Depués de la manifestación Andecha tien preparáu un actu en Noreña onde van inagurar un nuevu Llar Social. La convocatoria d'Andecha tamién ye en solitario baxo'l lema "Faciendo País. Ensin pautos vergoñosos".

P'acabar coles distintes opciones qu'ufierten los partios asturianistes ta'l Partíu Asturianista que va dir a facer un homenaxe al Rei Pelayo hasta Cangues d'Onís como ye costume nesti partíu.