Les exes del documentu de l'ALLA “van ser contemplaes nel Plan de Normalización”, confirma Gutiérrez

La conseyera de Cultura, Política Llingüística y Deporte, Ana Vanessa Gutiérrez, compareció per primer vez en comisión na Xunta Xeneral dende’l cambiu na estructura de Gobiernu. Informó sobre’l so programa de gobiernu y respondió una entruga sobre normalización llingüística.

Foi Adrián Pumares, de Foro, el que s’interesó “sobre qué actuaciones ta faciendo en materia de normalización lingüística”. La escritora respondió en primer llugar que “na mio intervención inicial yá daba cuenta de les llinies xenerales d’actuación de la Conseyería de Cultura pa los próximos cuatro años” pero citó delles en marcha como la modificación de l’actual Llei d’Usu y Promoción del Bable/Asturianu, la terminación de la tramitación alministrativa de la Oficina de Derechos Llingüísticu, el decretu nuevu de toponimia, les pruebes de conocimientu del gallego-asturiano, el Plan de Normalización Llingüística “qu’esperamos traer a esta Cámara próximamente” o’l desendolcu del traductor Eslema.2, ente otros, siempre ensin concretar fecha.

El llavianés, qu’usó a lo llargo de la comisión l’asturianu, al igual que la conseyera, fixo referencia al documentu de l’Academia de la Llingua Asturiana (ALLA) sobre’l Plan de Normalización y entrugó sobre actuaciones pa la presencia del asturianu nos medios de comunicación privaos y públicos o’l cumplimientu de la toponimia, una modificación p’ameyorar la presencia del asturianu na Rede de Museos, la especialidá docente o’l plan pilotu d’usu del idioma como llingua vehicular en Primaria”. “Facía vusté referencia a esos exes que l’Academia de la Llingua Asturiana treslladó al Gobiernu d’Asturies sobre les materies que consideraba que tenía que contemplar esi Plan de Normalización que se ta trabayando y puedo dicir, como yá treslladé nel so momentu al presidente de l’Academia de la Llingua Asturiana, que van ser contemplaes nesi Plan que queremos terminar cuanto antes”, informó Gutiérrez

Pola falta de tiempu d’intervención, la conseyera nun pudo contestar a tolos asuntos, pero sí apuntó que “ye fundamental esi mandatu-marcu nel que vustedes van trabayar agora” pa dignificar la presencia del idioma en RTPA. “Tamos trabayando neses orientaciones, al marxe del Plan de Normalización”, finó al ser cortada nesi momentu pola presidenta de la comisión.

Llinies d’actuación

Enantes, na so comparecencia a pidimientu propiu pa esponer les sos llinies principales d’actuación d’esta llexislatura como conseyera aseguró que “la oficialidá del asturianu ye un oxetivu irrenunciable pa esti Gobiernu”. Apuntó que va siguir reclamando al Estáu igualdá de tratu coles llingües cooficiales y la creación de la especialidá docente, amás de facer referencia a polítiques específiques de promoción y normalización llingüística, como los Premios Lliterarios y d’artes escéniques, a los que se van sumar esti añu los d’asturianada y guiones.

Otra manera, n’otres cuestiones, avanzó la participación d’artistes asturianos n’eventos d’impautu global como la Feria d'Arte de Shanghai, el Festival Interceltique de Lorient o la Feria del Libro de Guadalajara.

Na semeya, el secretariu xeneral téunicu de la conseyería, Jaime Hidalgo; Gutiérrez; y el direutor xeneral de Patrimoniu Cultural, Pablo León.