Les escueles van participar nuna campaña de concienciación pa un consumu responsable del agua

|
Les escueles van participar nuna campaña de concienciación pa un consumu responsable del agua

‘Nun dexar a naide atrás; agua pa toos’ ye’l lema del Día Mundial del Agua que se conmemora esti vienres, coincidiendo col 22 de marzu. Escolines y escolinos de Sobrescobiu y Casu conmemoraron esta xornada inaugurando la campaña pa un consumu responsable que va llegar escueles de tol país con visites a la Casa del Agua y a Baíña.

El Consorciu pal Suministru d’Agua y Sanamientu (Cadasa) púnxola güei en marcha en Rusecu en llinia col programa d’educación ambiental de prevención de residuos que Coxersa impulsa con ésitu dende’l 2005. D’esta forma busca dar a conocer el ciclu integral del agua, amás de sensibilizar y concenciar al alumnáu sobre l’usu responsable d’esti recursu, cola mira de promover bonos vezos.

Pa consiguir estos oxetivos y promover la reflexón ente los escolares, esti cursu van entamase visites a la Casa del Agua y a la estación de tratamientu d’agua potable, dambes en Rusecu, y a la estación de tratamientu d’agua residual de Baíña, en Mieres. Pa sofitar esta iniciativa, el Gobiernu, Cadasa y el Conceyu de Sobrescobiu firmaron güei, coincidiendo cola celebración del Día Mundial del Agua, un protocolu de collaboración que va valir pa impulsar l’usu y caltenimientu de dicha Casa del Agua, espaciu inauguráu nel 2002 cola mira de divulgar la importancia d’esti recursu y que se va convertir nel enclave fundamental pa la difusión del programa educativu del consorciu.

Cuatro actividaes diferentes

Más de cincuenta escolinos y escolines de 3 a 12 años de la Escuela Pública El Truébanu (El Campu) y del Colexu Rural Agrupáu Llaviana-Sobrescobiu foron los primeros en participar nesta campaña de concienciación ambiental pa fomentar un consumu responsable del agua. Repartíos en dos grupos, participaron en cuatro actividaes: la grabación d’un anunciu de televisión onde aportunen na necesidá d’alministrar l’agua de manera responsable pa que llegue a toles persones; entrevistes énte la cámara pa esponer los sos conocimientos; la decoración d’una gota xigante con delles espresiones artístiques como mensaxes o dibuxos; y un xuegu d’entrugues sobre l’agua.

Na semeya, Casa del Agua.

Contador Estadistiques