Les entraes pa la gala del XIV Premiu Camaretá al Meyor Cantar yá tán disponibles

El sábadu 22 va celebrase nel xixonés Teatru de la Llaboral la gala del XIV Premiu Camaretá al Meyor Cantar na que los trés finalistes van defender el so tema. Yá tán disponibles les entraes pa esta cita que va televisar TPA en direuto qu’añade una actuación de Llevólu’l Sumiciu xunto con Anabel Santiago a la de Carla Armas y Rubén García.

Algaire, que presenta ‘Coral y maera’ con lletra y música de Luis Ángel Fernández Santos; Mostru l’Horru, con ‘Fíu d’un pueblu’ con lletra de Francisco Méndez y música de Yannick Gutiérrez; y Dixebra, con ‘Como’l mar’, firmada por Primi Abella, son les trés grupos que convencieron al xuráu coles sos composiciones, correspondientes al periodu que va del 2021 a los cinco primeros meses del 2022. Van ser los primeros en tocar na gala, qu’esti añu incorpora una actuación más a la habitual del ganador de la edición anterior.

Asina, mientres los encargaos de valorar les actuaciones, van ufrir un conciertu breve Llevólu’l Sumiciu xunto con Anabel Santiago, en primer llugar, y Carla Armas y Rubén García, depués. Esti dúu llevó’l XIII Camaretá, correspondiente al 2020 y los primeros meses del 2021, gracies al cantar ‘El que conoz a tierra’, escrita na variante senabresa del idioma.

Por último, va dase a conocer el fallu del xuráu y la entrega d’un reconocimientu. El premiu compónse d’una recompensa de 6.000 euros y la realización d’un videoclip, asina como la promoción y espardimientu del cantar ganador nos medios de comunicación y nos eventos organizaos o promovíos pol Gobiernu, asina como nel circuitu Autores nel Camín del programa ‘Asturies, Cultura en Rede.’

La xente interesao n’asistir a la gala yá pueden retirar les entraes, de baldre, na web de la Llaboral, na Receición de la Llaboral, nel Centru d'Información Turística del Principáu d'Asturies (CITPA) n'Uviéu, nel Centru Niemeyer n'Avilés, nel teléfonu 952.07.62.62 o na páxina unientradas.es.

Na semeya, la Universidá Llaboral, cola fachada del teatru a la derecha.