Les empreses esportadores asturianes na rede

L´Institutu de Desarrollu d´Asturies (IDEPA) t´acabante d´espublizar el concursu públicu pal diseñu d´un portal d´Internet empobináu a la internacionalización de les empreses del país. Esti proyeutu ta enmarcáu dientro del Plan de Promoción Internacional del Principáu d´Asturies 2002-2004. El presupuestu del portal esportador ye de 116.000 euros, y el plazu de desarrollu del diseñu ye de cinco meses. Esti proyeutu incluye amás del portal el facer una estranet pa la esportación.

L´oxetivu ye da-yos sofitu a les empreses esportadores asturianes aprovechando les nueves tecnoloxíes. Ye evidente que nel procesu d´internacionalización de cualesquier empresa la rede d´Internet ye una ferramienta mui útil. Facer una base de datos d´empreses esportadores y potencialmente esportadores ye una de les partes más señeres del proyeutu. Esta base de datos va ser común pal IDEPA, les Cámares de Comerciu y Exportastur. La estranet va ser usada polos organismos anteriores na so xera d´internacionalizar y promocionar les empreses asturianes nel esterior. El portal quier ser un puntu de referencia pa les empreses del país pa lo que´l web tendrá noticies actualizaes del sector esportador, información de los planes de promoción del Gobiernu Asturianu, información de too tipu d´actividaes empresariales rellacionaes cola esportación, un catálogu d´esportadores, un catálogu de subcontratación, enllaces útiles rellacionaos cola esportación y información alrodiu de beques y bolsa de profesionales mozos. Ente les ferramientes del portal va destacar un potente buscador internu y una newsletter pa caltener informaos a tolos interesaos. Un bon entamu pal espardimientu de les empreses asturianes.