Les celebraciones del Antroxu modernu recuperen normalidá ensin quitar la mázcara

|
El Cornelu nel CP Marcelo Gago reducida

Folixa, disfraces y gastronomía axúntense nestos cinco díes próximos en toa Asturies na celebración del Antroxu modernu. Esta festividá asturiana recupera normalidá esti añu, con desfiles y celebraciones nes cais y nos chigres, anque se caltién la obligatoriedá d’usar la mázcara proteutora en zones d’interior y nel esterior cuando nun se pueda caltener la distancia de seguranza.

Les Comadres abre güei l’Antroxu modernu, festividá protagonizada por muyeres con orixe que pudiera tar fuera del Antroxu tradicional. Xixón y La Pola Siero son les villes que nos años últimos caltienen con más fuercia esta tradición que mantuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, 'teresites', frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles.

Col pasu del tiempu la folixa treslladóse de la tarde a la nueche y munchos restoranes ofrecen menús especiales pa esta xornada.

Premios en llinia

Ye de destacar tamién el llabor de la Tertulia Feminista Les Comadres pa potenciar esta fecha festiva, dando-y un toque reivindicativu. Esti añu, al igual que’l pasáu, decidióse facer una entrega de los sos premios, el ‘Comadre de Oro’ y el Felpeyu –ésti últimu a persones o entidaes que desprecien a la muyer– en llinia per Zoom dende les 19 hores.

El ‘Comadre de Oro’ ye p’Alianza Contra el Borrado de las Mujeres “pola llucha polos derechos de les muyeres basaos nel sexu y la visibilización de toles formas de discriminación contra muyeres y neñas que resulten de la sustitución de la categoría sexu por la de ‘identidá de xéneru’”. Va entregalu Mabel Lozano, gallardonada l’añu pasáu.

Nel llau de los antipremios, el títulu de Felpeyu recala en Raúl Martín Presa, presidente del Rayo, y al téunicu del equipu madrilanu Carlos Santiso, “al primeru por caltener nel cargu d’entrenador del equipu femenín al segundu, que dixo la ocurrencia ‘falta que garremos a una, pero que sía mayor d’edad pa nun metenos en ḥaris y cargánosla ehí toos xuntos’, dicho cuando entrenaba un equipo de fútbol masculín y pa, según él, facer equipu”. Otra manera, VOX, el bipartitu d’Uviéu de PP y Ciudadanos, la seición segunda de l’Audiencia de Navarra y el xuez Pablo Muñoz tamién tuvieron opciones de recibir esti ‘reconocimientu’ que l’añu pasáu foi pal “trifachito” PP, Ciudadanos y VOX.

Lloñe de la tradición

L’Antroxu entamaba nel pasáu col solsticiu d’iviernu, con mazcaraes per tol país, y agora, tres la recuperación acontecida cola fin del Franquismu, resúmese a les xornaes previes al Miércoles de Ceniza, primer día de la Cuaresma. Una vuelta, sicasí, alloñada de la tradición, imitando a los carnavales más mediáticos como’l de Rio de Janeiro, Tenerife, Las Palmas o Cádiz.

Los antroxos de Xixón y Avilés son los más importantes en cuantes a programa institucional y participación. Los xueves ye habitual ver a los neños amazcaraos nos colexos y los vienres en Xixón les charangues calecen motores pal concursu d’estes formaciones del sábadu y del domingu, que yá va pola so trentena cuarta edición con una participación alta y fileres na nueche pa mercar entrada pal Teatru Xovellanos.

El sábadu los focos van p’Avilés, onde se celebra’l Descensu Internacional y Fluvial de Galiana, na so trentena cuarta edición, a partir de les 19.30 hores cola participación de 12 peñes. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá, esti añu baxo la temática ‘Fantasía’, y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes –ye especialmente espectacular el de Xixón, con salida a les 19 hores de la plaza de toros– y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, sobre manera la más mozo.

El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne.

Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos, les casadielles y les picatostes.

Celebración en Cuaresma

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como asocede en Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa, asina como otru de Pilar Sánchez Vicente entituláu 'L'Antroxu'. Los más mozos tamién pueden averase a esta celebración col reportaxe de la nuesa estaya infantil 'A la Gueta los Suaños' sobre la tradición o ésti nuevu entituláu 'L'Antroxu y la lluna' qu’esplica por qué cai nuna fecha diferente cada añu.

Na semeya, El Cornelu, mazcaritu del Antroxu tradicional avilesín que'l Coleutivu Abillés Antroxu Tradicional quier recuperar, que visitó ayeri xunto a La Vieya a los escolinos del avilesín CP Marcelo Gago.

Contador Estadistiques